Pune News: पुण्यात फायनान्स कंपनीविरोधात शिंदेसेना आक्रमक, शेतकऱ्याच्या घराचं सील तोडलं

पुण्याच्या दौंड तालुक्यातील शेतकऱ्याच्या घराला फायनान्स कंपनीने लावलेले सील शिवसेनेच्या कार्यकर्त्यांनी तोडून टाकले. फायनान्स कंपनीच्या कर्जाचे हप्ते थकल्याने न्यायालयाच्या आदेशानुसार दौंड तालुक्यातील शेतकऱ्याच्या घराला सील लावल्यामुळे शेतकऱ्याला कुटुंबासहित ऐन दिवाळीत उघड्यावर राहण्याची वेळ आली. या परिस्थितीमुळे शिक्षण घेत असलेल्या दोन मुलींच्या डोळ्यात अश्रू आहेत. दरम्यान परिस्थितीची माहिती मिळताच पुणे जिल्हा शिवसेना शेतकरी विभागाचे जिल्हाप्रमुख रामदास दोरगे यांनी या कुटुंबाला आनंदाचा शिधा दिलाय. तसेच शिवसेना स्टाईल कार्यकर्त्यांसह शेतकऱ्याच्या घराला लावलेले सील तोडले आहे. फायनान्स कंपनीवर कारवाई करण्याची मागणी एकनाथ शिंदे यांच्याकडे करण्यात आली आहे.