छत्तीसगडच्या जशपूर जिल्ह्यातून एका खळबळजनक हत्याकांड समोर आला आहे. एका नशेखोर पतीनं पत्नीची निर्घृण हत्या केली आहे. मिळालेल्या माहितीनुसार, दारूच्या नशेत नवऱ्यानं बायकोच्या डोक्यावर लघवी करण्याचा प्रयत्न केला. तिनं या गोष्टीचा प्रतिकार केला. यानंतर नवऱ्याला राग अनावर झाला. संतापून नवऱ्यानं धारदार शस्त्राने पत्नीवर वार केले. या हल्ल्यात बायकोचा जागीच मृत्यू झाला. या घटनेची माहिती मिळताच पोलिसांनी घटनास्थळी धाव घेतली. तसेच तपास करून आरोपी पतीला ताब्यात घेतलं. सध्या पोलिसांकडून पुढील तपास सुरू आहे.

ही धक्कादायक घटना बगीचा पोलीस स्टेशन परिसरातील पंड्रापाठ चौकीतील पाकरीटोली गावात घडली. मिळालेल्या माहितीनुसार, लरंगसाय कोरवा असे आरोपीचं नाव आहे. आरोपी दररोज दारू पिऊन घरी यायचा. सोमवारी सायंकाळी तो दारू पिऊन घरी परतला. यादरम्यान, त्यानं त्याची पत्नी संतोषी बाई (वय वर्ष ४०) हिच्यावर लघवी करण्याचा प्रयत्न केला.

यानंतर तिने प्रतिकार केला. तेव्हा आरोपीला राग अनावर झाला. त्यानं घरात ठेवलेल्या धारदार शस्त्राने तिच्यावर हल्ला केला. या हल्ल्यात बायको रक्ताच्या थारोळ्यात पडली. तिचा जागीच मृत्यू झाला. या घटनेमुळे गावात खळबळ उडाली. शेजाऱ्यांना घटनेबाबत माहिती मिळताच त्यांनी पोलीस ठाण्यात धाव घेतली.

शेजाऱ्यांनी या घटनेबाबत पोलिसांना माहिती दिली. पंड्रापाठ पोलीस घटनास्थळी पोहोचले. त्यांनी मृतदेह ताब्यात शवविच्छेदनासाठी रूग्णालयात पाठवला. तसेच पंचनामा करून तपासाला सुरूवात केली. पोलिसांनी तपास करून आरोपीला बेड्या ठोकल्या आहेत. या प्रकरणाचा पुढील तपास पोलिसांकडून सुरू आहे.