Donald Trump Tariff : अमेरिकेचे राष्ट्राध्यक्ष डोनाल्ड ट्रम्प यांनी पुन्हा एकदा रशियाची कोंडी करण्याचा प्रयत्न सुरु केला आहे. जर रशियावर दबाव आणायचा असेल, तर भारतावर १०० टक्के टॅरिफ कर लादला पाहिजे असे ट्रम्प यांनी युरोपियन युनियनला (EU) सांगितले आहे. एका बाजूला भारत आणि अमेरिका मित्र आहेत, दोन्ही देशात व्यापारावर चर्चा होईल असे म्हणायचे आणि दुसऱ्या बाजूला भारतावर १०० टक्के टॅरिफ लादला हवा असे सांगायचे. या कृतीवरुन डोनाल्ड ट्रम्प यांचे दुटप्पी वर्तन समोर आले आहे.

डोनाल्ड ट्रम्प यांनी एक पोस्ट व्हायरल होत आहे. या पोस्टमध्ये त्यांनी 'भारत आणि अमेरिका यांच्यात व्यापाराशी संबंधित अडथळे दूर करण्यासाठी चर्चा सुरु आहे. येत्या काही दिवसात माझे चांगले मित्र, पंतप्रधान नरेंद्र मोदी यांच्याशी चर्चा होणार आहे. यासाठी मी खरंच उत्सुक आहे. या संवादाद्वारे दोन्ही देशांना व्यापारासंबंधित प्रश्न सोडवणे सोपे होईल', असे म्हटल्याचे पाहायला मिळते.

दुसऱ्या बाजूला ट्रम्प यांनी भारतावर टॅरिफ लादण्याबाबत सूचना केल्या. जोपर्यंत भारत आणि चीन रशियाकडून तेल खरेदी करणे थांबवत नाहीत, तोपर्यंत त्यांच्यावर टॅरिफ लादत रहा, असे ट्रम्प यांनी युरोपियन युनियनला सांगितल्याची माहिती रॉयटर्सने दिली आहे. या विषयावर ट्रम्प यांच्या एका अधिकाऱ्याने 'आम्ही पूर्णपणे तयार आहोत. पण आमचे युरोपियन भागीदार जो निर्णय घेतील', आम्ही तेच करु असे सांगितले.

भारत आणि अमेरिका यांच्यामध्ये तणावाची परिस्थिती निर्माण झाली होती. टॅरिफच्या मुद्द्यावरुन दोन्ही देशांमध्ये तणावाची स्थिती होती. ट्रम्प यांनी सुरुवातीला भारतावर २५ टक्के टॅरिफ लादला होता. त्यानंतर त्यांनी त्यात आणखी २५ टक्क्यांची वाढ केली. भारत रशियाकडून तेल खरेदी करत असल्याने टॅरिफचा तणाव सुरु असल्याचे म्हटले जात आहे.