तामिळनाडूच्या कोडाईकनालमधून हादरवून टाकणारी घटना समोर आली आहे. एका तरुण डॉक्टरने इंजेक्शन घेऊन आत्महत्या केली. कोडाईकनाल या डोंगराळ भागात कारमध्ये या डॉक्टरचा मृतदेह आढळून आला. तीन दिवस कारमध्येच त्यांचा मृतदेह पडून होता. या डॉक्टरने विषारी इंजेक्शन घेऊन आत्महत्या केल्याचे सांगितले जात आहे. स्थानिक नागरिकांना जंगलात ही कार दिसली. त्यांनी पोलिसांना माहिती दिल्यानंतर हा धक्कादायक प्रकार उघडकीस आला.

मिळालेल्या माहितीनुसार, जोशुआ समराज असं या आत्महत्या केलेल्या डॉक्टरचे नाव आहे. हा डॉक्टर कर्जबाजारी झाला होता. कर्जबाजारीपणाला कंटाळूनच डॉक्टरने आत्महत्या केली. कारमध्येच इंट्राव्हेनस फ्लुइड्स इंजेक्शन घेऊन त्याने आत्महत्या केली. जोशुआ समराज हे सालेममध्ये एमडीचे शिक्षण घेत होते आणि मदुराई येथील एका रुग्णालयात ते काम करत होते.

डॉक्टरची कार कोडाईकनालजवळील पूमपाराईच्या एका दुर्गम जंगलात तीन दिवसांपासून उभी होती. स्थानिक रहिवाशांनी ही कार पाहिली आणि त्यांनी तात्काळ पोलिसांना माहिती दिली. पोलिसांनी घटनास्थळी धाव घेत कार उघडली तर त्यामुळे डॉक्टराचा मृतदेह आढळला. मृतदेहाशेजारीच सुसाईड नोट आढळून आली. यामध्ये डॉक्टरने आत्महत्येचे कारण लिहिले होते. कर्जबाजारीपणामुळे चिंतेत येऊन डॉक्टरने हे टोकाचे पाऊल उचलले असल्याचे पोलिासांनी सांगितले.

डॉक्टरने सुसाईड नोटमध्ये त्याच्या कुटुंबियांची माफी मागितली. परंतु त्याने कोणालाही दोष दिलेला नाही किंवा कोणतेही कारण दिलेले नाही. त्याच्या कुटुंबाने सांगितले आहे की, काही नातेसंबंधातील समस्यांमुळे डॉक्टर नैराश्यात होता. डॉक्टर कर्जबाजारी झाला होता पण त्याने कर्ज कशासासठी घेतले होते याची माहिती समोर आली नाही. त्याच्या आत्महत्येमुळे कुटुंबीयांना मोठा धक्का बसला.