Amravati: “माझं स्वप्न डॉक्टर होण्याचं होतं” वडिलांची परिस्थिती बिकट अन्.. दहावीत ९६ टक्के मिळवणाऱ्या तरूणीची आत्महत्या

डॉक्टर बनण्याचं स्वप्न उराशी बाळगणाऱ्या तरूणीनं शिक्षणाचा खर्च कुटुंबाला झेपणार नाही म्हणून आत्महत्या केली आहे. “माझं स्वप्न डॉक्टर होण्याचं होतं, पण ते अपूर्णच राहील...” अशा आशयाची नोंद आपल्या डायरीत लिहून तिनं राहत्या घरात आयुष्य संपवलं आहे. ही ह्रदयद्रावक घटना अमरावतीच्या दर्यापुरात घडली असून, या घटनेनंतर परिसरात खळबळ उडाली आहे.

सायली नवलकार (वय १७ वर्ष) असे मृत विद्यार्थीनीचे नाव आहे. अकरावीत उत्तम गुणांनी उत्तीर्ण होत बारावीच्या प्रवेशासाठी तिची तयारी सुरू होती. तिला नीटची परिक्षा देऊन डॉक्टर होण्याचं स्वप्न पूर्ण करायचं होतं. मात्र, आर्थिक परिस्थिती बिकट असल्याने शिक्षणाचा खर्च कसा पेलायचा, या चिंतेने ती खचली होती.

सतत तिला या गोष्टीची चिंता सतावत होती. याच कारणामुळे तिने टोकचं पाऊल उचलण्याचं ठरवलं. घटनेच्या वेळी सायली घरात एकटी होती. छताच्या पंख्याला ओढणी लावून तिने आत्महत्या केली. याची माहिती तिच्या कुटुंबाला मिळताच त्यांनी घरात हंबरडा फोडला. तातडीने पोलिसांना याची माहिती देण्यात आली.

पोलिसांनी मृतदेह शवविच्छेदनासाठी रूग्णलयात पाठवले. तसेच तपासाला सुरूवात केली. पोलिसांच्या प्राथमिक तपासात तिच्या घरात पोलिसांना एक डायरी सापडली. पोलिसांना मिळालेल्या डायरीत तिने वडिलांची आर्थिक परिस्थिती आणि शिक्षणासाठी लागणाऱ्या खर्चामुळे आत्महत्या करत असल्याचं तिनं डायरीत स्पष्टपणे लिहिलं आहे.

सायली ही अतिशय हुशार आणि मेहनती विद्यार्थिनी होती. दहावीच्या परीक्षेत तिने ९६ टक्के गुण मिळवले होते. तिच्या आत्महत्येनं परिसरात हळहळ व्यक्त होत आहे. पोलिसांनी आकस्मिक मृत्यूची नोंद केली असून पुढील तपास सुरू आहे.