Summary -

• दिल्लीतील रोहिणी नगरमध्ये मध्यरात्री मोठी चकमक झाली

• बिहारच्या सिग्मा गँगचे ४ कुख्यात गँगस्टर्सचा खात्मा करण्यात पोलिसांना यश

• दिल्ली पोलिस आणि बिहार पोलिसांची संयुक्त कारवाई

• गँगस्टर्स बिहार निवडणुकीपूर्वी दहशत माजवण्याचा कट रचत होते

दिल्लीच्या रोहिणीनगरमध्ये मध्यरात्रीच्या सुमारास मोठी चकमक झाली. ज्यामध्ये बिहारच्या मोस्ट वॉन्टेड सिग्मा गँगच्या ४ कुख्यात गँगस्टरचा खात्मा करण्यात आला. ही कारवाई दिल्ली पोलिसांच्या क्राईम ब्रँच आणि बिहार पोलिसांनी एकत्रित केली. गोळीबाराच्या आवाजाने रोहणीनगर हादरून गेले आणि नागरिकांमध्ये भीतीचे वातावरण होते. ठार करण्यात आलेले गँगस्टर विधानसभा निवडणुकीपूर्वी बिहारमध्ये दहशत निर्माण करण्याचा कट रचत होते.

मिळालेल्या माहितीनुसार, मध्यरात्री २:२० वाजताच्या सुमारास ही चकमक झाली. डॉक्टर आंबेडकर चौक ते पानसाळी चौक या बहादूर शाह मार्गावर ही चकमक झाली. पोलिस आणि गुन्हेगारांमध्ये जोरदार गोळीबार झाला. ज्यामध्ये चार जण जखमी झाले. नंतर चौघांनाही उपचारासाठी रोहिणी येथील डॉ. बीएसए रुग्णालयात नेण्यात आले पण डॉक्टरांनी त्यांना मृत घोषित केले.

चकमकीत ठार झालेल्यांमध्ये रंजन पाठक (25 वर्षे), बिमलेश महातो उर्फ ​​बिमलेश साहनी (25 वर्षे), मनीष पाठक (33 वर्षे) आणि अमन ठाकूर (21 वर्षे) यांचा समावेश आहे. रंजन, बिमलेश आणि मनीष हे तिघेही बिहारमधील सीतामढी जिल्ह्यातील रहिवासी होते. तर अमन ठाकूर हा दिल्लीतील करावल नगरमधील शेरपूर गावचा रहिवासी होता.

दिल्ली पोलिसांच्या म्हणण्यानुसार, दिल्ली पोलिसांच्या गुन्हे शाखा आणि बिहार पोलिसांनी दिल्लीत एक मोठी संयुक्त कारवाई केली. या चकमकीत बिहारमधील तीन गुन्हेगार आणि त्यांचा एक साथीदार ठार झाला. हे सर्वजण सिग्मा गँगचे गँगस्टर होते. चकमकीत ठार झालेला रंजन पाठक हा सिग्मा गँगचा म्होरक्या होता. या गँगस्टर्सनी अनेक गुन्हे करत दहशत माजवण्याचा प्रयत्न केला होता.