तुम्ही सुद्धा तुमच्या मुलांना 'डे केअर'मध्ये ठेवत असाल तर सतर्क राहा आणि ही बातमी वाचा. उत्तर प्रदेशातील नोएडा येथे एका हृदयद्रावक घटनेने संपूर्ण परिसर हादरला आहे. सेक्टर १३७ मधील पारस टिएरा सोसायटीमधील एका डे केअर सेंटरमध्ये केवळ १५ महिन्यांच्या निष्पाप चिमुकलीवर अत्याचार आणि अमानुष वागणूक दिल्याचा धक्कादायक प्रकार उघडकीस आला आहे. या प्रकरणात डे केअर सेंटरमध्ये कार्यरत असलेल्या मोलकरणीवर मुलीला चापट मारून जमिनीवर फेकल्याचा गंभीर आरोप करण्यात आला आहे. एवढ्यावरच ती थांबली नाही, तर तिने मुलीला प्लास्टिकच्या पट्ट्याने मारहाण केली आणि चावा घेतल्याचेही समोर आले आहे. या अमानुष वर्तणुकीमुळे चिमुकलीला गंभीर दुखापत झाली असून, तिच्या आईने त्वरित पोलिसांकडे धाव घेत तक्रार दाखल केली आहे.

कुटुंबीयांनी सांगितले की, चिमुकलीच्या शरीरावर चाव्याच्या खुणा स्पष्टपणे दिसत होत्या. डॉक्टरांनी तपासणीदरम्यान या जखमा चाव्याच्या असल्याचे पुष्टीकरण केले. याशिवाय चिमुकलीला चापट मारणे, जमिनीवर फेकणे आणि प्लास्टिकच्या पट्ट्याने मारणे हे प्रकार देखील झाल्याचे निष्पन्न झाले. या घटनेचा पुरावा म्हणून डे केअर सेंटरमधील सीसीटीव्ही फुटेजमध्ये मोलकरीण चिमुकलीला जमिनीवर जोरात फेकताना दिसत आहे. या वेळी ती चिमुकली मोठ्याने रडताना आढळून आली, मात्र डे केअरच्या प्रमुखाने हस्तक्षेप करण्याऐवजी संपूर्ण घटनेदरम्यान निष्क्रिय भूमिका घेतली.

तक्रारीत असेही नमूद करण्यात आले आहे की या प्रकारानंतर मोलकरीण आणि डे केअरच्या प्रमुखाने कुटुंबीयांविरुद्ध अपशब्दांचा वापर केला. पोलिसांनी हा प्रकार अत्यंत गांभीर्याने घेत तात्काळ कारवाई केली असून, आरोपी मोलकरणीला ताब्यात घेतले आहे. सध्या पुढील तपास सुरू आहे.

या घटनेमुळे नोएडामध्येच नव्हे तर संपूर्ण शहरात डे केअर सेंटरच्या सुरक्षिततेबद्दल आणि मुलांच्या काळजीबाबतच्या जबाबदारीवर गंभीर प्रश्न उपस्थित झाले आहेत. पालक आपल्या मुलांना विश्वासाने डे केअरमध्ये सोपवतात, मात्र अशा घटना त्या विश्वासाला तडा देतात. मुलांच्या सुरक्षेसाठी अशा संस्थांवर कठोर देखरेख आणि नियमांची अंमलबजावणी करण्याची मागणी आता जोर धरू लागली आहे.