नवी दिल्ली : संविधान निर्माता डॉ. बाबासाहेब आंबेडकर आणि संविधानाच्या मुद्द्यावरून संपूर्ण देशातील राजकारण तापलं आहे. या मुद्यावरून सुरु झालेल्या वादाला हिंसक वळण लागलं आहे. या मुद्द्यावरून चंदीगड महापालिकेत काँग्रेस, भाजप आणि आम आदमी पक्षाच्या नगरसेवक भिडले. यावेळी केंद्रीय गृहमंत्री अमित शहा यांच्या राजीनाम्याचा प्रस्ताव पालिकेच्या सभागृहात मांडला. या प्रस्तावाच्या विरोधात भाजप नगरसेवकांनी आक्रमक भूमिका घेतली.

पालिकेच्या सभागृहात नगरसेवकांनी एकमेकांना मारहाण केली. ही संपूर्ण घटना सीसीटीव्ही कॅमेऱ्यात कैद झाला आहे. या मारहाणीचा व्हिडिओ सोशल मीडियावर व्हायरल झाला आहे. या व्हिडिओमध्ये नगरसेवक एकमेकांना मारहाण करताना दिसत आहे.

संपूर्ण वाद हा नगरसेवक अनिल मसीह हे सभागृहात पोहोचल्यानंतर सुरु झाला. ते सभागृहात पोहोचल्यानंतर काँग्रेस आणि आपच्या नगरसेवकांनी नारा दिला.

नगरसेवक अनिल मसीह यांनी मत चोर म्हणत नारा दिला. यामुळे अनिल मसीह यांना राग आला. काँग्रेसच्या नगरसेवकांनी म्हटलं की, 'राहुल गांधी आणि सोनिया गांधी यांच्यासहित काँग्रेसचे अनेक नेत जामीनावर बाहेर आहेत. यानंतर आपचे नगरसेवक आणि काँग्रेसच्या नगरसेवकांनी पोस्टर झळकवले. यावेळी भाजपच्या नगरसेवकांनी पोस्टर हातातून हिसकावून घेण्याचा प्रयत्न केला. यावेळी दोन्ही गटाच्या नगरसेवकांनी एकमेकांना मारहाण केली.

काही नगरसेवक मारहाणीदरम्यान सीसीटीव्ही कॅमेरात आढळले. या व्हिडिओत दोन्ही गटाचे नगरसेवक हाणामारी करताना दिसले. यावेळी नगरसेवकांनी केंद्रीय गृहमंत्री अमित शहा यांच्या डॉ. बाबासाहेब आंबेडकर यांचा अपमान केल्याचा आरोप केला. दुसरीकडे भाजप नेत्यांनी हे आरोप फेटाळून लावले आहेत.

दरम्यान, संसदेच्या हिवाळी अधिवेशनात केंद्रीय गृहमंत्री अमित शहा यांनी विरोधकांवर टीका करताना डॉ. बाबासाहेब आंबेडकर यांच्या नावाचा उल्लेख करत निशाणा साधला होता. मात्र, अमित शहा यांच्या त्याच वक्तव्यावरून काँग्रेस खासदारांनी जोरदार विरोध केला होता.