Chhattisgarh accident Death Toll : छत्तीसगडमधील बालोद जिल्ह्यात राष्ट्रीय महामार्ग-३० (NH-30) वर भीषण अपघात झाला आहे. जगतरा गावाजवळ भरधाव बोलेरो गाडी आणि ट्रॅक्टर-ट्रॉली यांच्यात झालेल्या भयंकर धडकेत ६ जणांचा जागीच मृत्यू झाला. तर या अपघातात ७ जण गंभीर जखमी झाले आहेत. अपघातानंतर महामार्गावर मोठ्या प्रमाणात वाहतूककोंडी झाली होती.

स्थानिक मीडियाने दिलेल्या मिळालेल्या माहितीनुसार, बोलेरो गाडीतील सर्व प्रवाशी एका कार्यक्रमावरून परत घराकडे जात होते. त्यावेळीच काळाने घाला घातला. जगतरा गावाजवळ रस्त्यावरून जाणाऱ्या ट्रॅक्टर-ट्रॉलीला भरधाव बोलेरोने मागून जोरदार धडक दिली. ही धडक इतकी भीषण होती की बोलेरो गाडीच्या समोरील भागाचा चक्काचूर झाला. अपघातानंतर गाडीत प्रवासी अडकले होते.

स्थानिक नागरिकांनी तत्परता दाखवत पोलिसांना या अपघाताची माहिती दिली आणि बचावकार्य सुरू केले. घटनेची माहिती मिळताच पुरुर पोलीस ठाण्याचे पथक घटनास्थळी दाखल झाले. पोलिसांनी स्थानिक आणि रुग्णवाहिकेच्या मदतीने गाड्यात अडकलेल्या लोकांना बाहेर काढले. या अपघातात ६ जणांचा जागीच मृत्यू झाल्याचे डॉक्टरांनी सांगितले.

या अपघातात जखमी झालेल्या ७ जणांना तातडीने जवळच्या शासकीय रुग्णालयात उपचारासाठी दाखल करण्यात आले आहे. त्यांच्यावर सध्या उपचार सुरू आहेत. या जखमींपैकी काहींची प्रकृती चिंताजनक असल्याने मृतांचा आकडा वाढण्याची भीती व्यक्त केली जात आहे. पोलीस सध्या या प्रकरणाचा सविस्तर तपास करत असून मृतदेहांचे पोस्टमार्टम केले जात आहे. पोलिसांकडून मृतदेहाची ओळख पटवण्याचे काम सुरू आहे.