CBSE Exam 2025: केंद्रीय माध्यमिक शिक्षण मंडळाने (CBSC) दहावी आणि बारावीच्या परीक्षांमध्ये कॉपीसारख्या अनुचित गोष्टी होऊन नये यासाठी कठोर नियम लागू केले आहेत. परीक्षा सुरु असताना मोबाईल फोन अथवा अन्य कोणत्याही प्रकारचे इलेक्ट्रॉनिक उपकरण वापरण्यावर पूर्णपणे बंदी घालण्याचा निर्णय बोर्डाने घेतला आहे. जर एखादा विद्यार्थ्यांने या नियमाचे पालन केले नाही, तर त्याला दोन वर्ष परीक्षेला बसता येणार नाही. पूर्वी ही शिक्षा एक वर्षापुरती मर्यादित होती.

परीक्षा नियंत्रक डॉ. संयम भारद्वाज यांनी या संदर्भात माहिती दिली. परीक्षेदरम्यान कॉपी करणाऱ्या विद्यार्थ्यांवर आधी एका वर्षाचा बॅन लावला जात असे. पण आता कॉपी केल्यावर विद्यार्थाला दोन वर्ष परीक्षा देता येणार नाही. या व्यतिरिक्त परीक्षेसंबंधित सोशल मीडियावर अफवा पसरवणाऱ्यांवरही कारवाई केली जाणार आहे. मागच्या वर्षी परीक्षेबद्दल अनेक अफवा पसवरल्या गेल्या होत्या.

परीक्षेमध्ये पारदर्शिकता राहावी यासाठी सर्व परीक्षा केंद्रात सीसीटीव्ही कॅमेरे बसवण्यात आले आहेत. याशिवाय परीक्षा देणाऱ्या विद्यार्थ्यांकडे कोणतेही इलेक्ट्रीक उपकरण आहे का याचीही केंद्रात तपासणी केली जाणार आहे. परीक्षा सुरु असताना कोणताही गैरप्रकार होऊ नये यासाठी शासनाचे प्रयत्न सुरु आहेत.

सीबीएसई बोर्डाच्या दहावी आणि बारावीच्या परीक्षा १५ फेब्रुवारीपासून सुरु होणार आहे. परीक्षा सुरळीतपणे पार पाडल्या जाव्यात यासाठीची तयारी बोर्डाने सुरु केली आहे. यासाठी बोर्डाने काही नियमांमध्ये बदल केले आहेत. या नियमांची अंमलबजावणी करण्याचे आदेश बोर्डाने दिले आहेत.