हॉट एअर बलूनला हवेतच भीषण आग लागल्याची घटना घडली आहे. त्यानंतर हॉट एअर बलून थेट जमिनीवर कोसळला. या दुर्घटनेत ८ जणांचा जागीच मृत्यू झाला आहे. ब्राझील देशात ही दुर्घटना घडली आहे. या घटनेचा थरार कॅमेऱ्यात कैद झाला आहे.

मिळालेल्या माहितीनुसार, ब्राझीलच्या दक्षिणेकडील सांता कॅटरिना राज्यात हॉट एअर बलूनला भीषण आग लागल्याची घटना घडली. या एअर बलूनमध्ये एकूण २१ जण होते. त्यातील ८ जणांचा मृत्यू झाला आहे. ही दुर्घटना सकाळच्या सुमारास घडली. सांता कॅटरिना शहर पर्यटनासाठी प्रसिद्ध आहे. या ठिकाणी हजारो लोक पर्टनासाठी येत असतात. या घटनेने पर्यटकांमध्ये एकच भीती पसरली.

ब्राझीलमधील अग्निशमन विभागाच्या माहितीनुसार, शनिवारी सकाळी हॉट एअर बलूनला आग लागली. आग लागल्यानंतर दुर्घटनाग्रस्त बलून प्रिया ग्रांडे शहरात कोसळलं. या दुर्घटनेतून १३ जण बचावले आहेत. तर ८ जणांचा दुर्दैवी मृत्यू झाला आहे'.

गवर्नर जोर्जिन्हो मेलो यांनी सांगितलं की, 'बचाव पथकाकडून घटनास्थळी अन्य लोकांची शोधाशोध सुरु आहे. आम्ही सर्व या घटनेने हादरलो आहोत'. अग्निशमन विभागाच्या माहितीनुसार, १३ जणांचा बचावले असून त्यांना रुग्णालयात दाखल करण्यात आलं आहे.

व्हिडिओमध्ये काय दिसत आहे?

एअर बलूनला सुरुवातीला आग लागली. त्यानंतर बलूनमधून धूर निघू लागला. त्यानंतर बलून हळूहळू जमीनीवर कोसळू लागला. सांता कॅटरिनातील अग्निशमन दलाने सांगितलं की, 'एअर बलूनमध्ये पायलटसह २१ लोक होते'.

मागच्या रविवारी साओ पाऊलो या शहरात हॉट एअर बलून कोसळला होता. त्यात एका २७ वर्षीय महिलेचा मृत्यू झाला होता. तर ११ जण जखमी झाले होते. त्यानंतर पुन्हा एकदा हॉट एअर बलूनला आग लागल्याची घटना घडली आहे.