छतीसगडमधील अंबिकापुर-रायगड राष्ट्रीय महामार्ग क्रमांक 43 वर भीषण अपघात झाला आहे. शांतिपारा परिसरात शुक्रवारी रात्री भरधाव ट्रकने दुचाकी चालवत असलेल्या भाजप नेत्याला जोरदार धडक दिली. धडकेनंतर ते ट्रकखाली अडकून सुमारे 20 मीटरपर्यंत फरफटत गेले. गंभीर जखमी अवस्थेत त्यांना रुग्णालयात दाखल करण्यात आले, मात्र उपचारादरम्यान त्यांचा मृत्यू झाला. ही घटना बतौली पोलीस ठाण्याच्या हद्दीत घडली आहे.

मिळालेल्या माहितीनुसार, बतौली तालुक्यातील पोकसरी गावचे रहिवासी आणि भाजपचे बूथ अध्यक्ष शिवमंगल दास (वय 50) हे शुक्रवारी दुपारनंतर काही कामानिमित्त बतौली येथे आले होते. रात्री सुमारे 9.30 वाजता ते दुचाकीने घरी परतत असताना शांतिपारा जवळ अज्ञात ट्रकने त्यांना जोरदार धडक दिली. धडकेनंतर ते रस्त्यावर कोसळले असता ट्रकने त्यांना सुमारे 20 मीटरपर्यंत ओढत नेले.

रुग्णालयात मृत्यू, चालक फरार

या अपघातात शिवमंगल दास गंभीर जखमी झाले होते. स्थानिकांनी दिलेल्या माहितीनुसार, डायल 112 पथकाने त्यांना तातडीने सामुदायिक आरोग्य केंद्रात दाखल केले. मात्र अंतर्गत गंभीर दुखापतीमुळे उपचारादरम्यान त्यांचा मृत्यू झाला. अपघातानंतर ट्रक चालक वाहनासह घटनास्थळावरून फरार झाला. स्थानिकांना ट्रकचा क्रमांक नोंदवता आला नाही. बतौली पोलिसांनी अज्ञात ट्रक चालकाविरुद्ध गुन्हा दाखल केला असून सीसीटीव्ही फुटेजच्या आधारे ट्रकचा शोध घेतला जात आहे.

शनिवारी मृतदेहाचे शवविच्छेदन करून तो नातेवाईकांच्या ताब्यात देण्यात आला. शिवमंगल दास यांच्या निधनाचे वृत्त समजताच भाजपचे अनेक नेत्यांना श्रद्धांजली वाहिली असून पक्षात हळहळ व्यक्त केली जात आहे. तसेच अनेक नेत्यांनी त्यांचे नियोजित दौरे रद्द करत दास यांच्या निवासस्थानी दाखल झाले आहेत.