Tragic Road Accident : भीषण अपघात! ट्रक धडकल्यानंतर प्रवाशांनी भरलेला ट्रॅक्टर तुंगभद्रा पुलावरून कोसळला, ६ जणांचा मृत्यू

ट्रकच्या धडकेनंतर प्रवाशांनी भरलेला ट्रॅक्टर थेट पुलावरून खाली कोसळून झालेल्या भीषण अपघातात ६ जणांचा मृत्यू झाला. कर्नाटकातील कोप्पल जिल्ह्यात तुंगभद्रा पुलावर घडली. या भीषण अपघातात नऊ जण जखमी झाले आहेत. या अपघाताची माहिती पोलिसांनी दिली.

अपघातग्रस्त ट्रॅक्टर ट्रॉलीमध्ये एकूण १५ प्रवासी होते. ते सर्व जण हुलिगे मंदिराकडे जात होते. कोप्पल जिल्ह्यातील मुनिराबाद पोलीस ठाण्याच्या हद्दीतील तुंगभद्रा पुलावर एका ट्रकने ट्रॅक्टरला जोरदार धडक दिली. पोलिसांनी दिलेल्या माहितीनुसार, ट्रकची धडक इतकी जोरदार होती की, ट्रॅक्टरच्या चालकाचे नियंत्रण सुटले. त्यानंतर ट्रॅक्टर अनियंत्रित होऊन तुंगभद्रा पुलाच्या खाली कोसळला.

या भीषण दुर्घटनेत ट्रॉलीतील सहा जणांचा मृत्यू झाला. तर अन्य नऊ जण जखमी झाले. पोलिसांनी दिलेल्या माहितीनुसार, अपघात घडला त्यावेळी ट्रॅक्टरमधून १५ जण प्रवास करत होते. ते हुलिगे मंदिराकडे जात होते. प्राथमिक तपासाच्या आधारे कोप्पलचे पोलीस अधीक्षक राम एल अरसिद्दी यांनी वृत्तसंस्थांना सांगितले की, ट्रकने ट्रॅक्टरला जोरदार धडक दिली. त्यामुळे ट्रॅक्टर चालकाचा ताबा सुटला आणि तो ट्रॅक्टर पुलाखाली कोसळला.

या अपघातात सहा प्रवाशांचा जागीच मृत्यू झाला. तर अन्य नऊ प्रवासी जखमी झाले आहेत. या जखमी प्रवाशांना उपचारासाठी नजीकच्या रुग्णालयात दाखल करण्यात आले आहे. मुनिराबाद पोलीस ठाण्याच्या हद्दीत तुंगभद्रा पूल आहे. पोलिसांनी या अपघाताचा सखोल तपास सुरू केला आहे.

बुंदेलखंड महामार्गावर अपघात, ४ ठार

उत्तर प्रदेशातील महोबा जिल्ह्यात बुंदेलखंड एक्स्प्रेस वेवर गुरुवारी सकाळी कार आणि ट्रकमध्ये झालेल्या भीषण अपघातात एकाच कुटुंबातील चार जणांचा मृत्यू झाला. तर एक अल्पवयीन मुलगी गंभीर जखमी झाली आहे, अशी माहिती पोलिसांनी दिली.

देहात पोलीस ठाण्याच्या हद्दीत हथौरा गावाजवळ हा अपघात झाला. भरधाव कार उभ्या असलेल्या ट्रकला धडकली. यात कारमधील चौघांचा मृत्यू झाला. त्यात मुलगा, आई, आजी आणि काकीचा समावेश आहे. तर तरुणाची लहान बहीण या अपघातातून बचावली आहे. ती गंभीर जखमी असून, तिच्यावर उपचार सुरू आहेत, अशी माहिती पोलिसांनी दिली.