बिहार विधानसभेच्या सर्व २४३ जागांसाठी मत मोजणी केली जाईल.निवडणूक आयोगाने मतमोजणीची तयारी पूर्ण केली आहे. पारदर्शकता, सुरक्षा आणि कार्यक्षमता सुनिश्चित करण्यासाठी निवडणूक आयोगाने सविस्तर मार्गदर्शक तत्त्वे जारी केली आहेत. मतमोजणीच्या वेळी ४,३७२ टेबलावर ५ कोटी मतांची मतमोजणी केली जाईल.

बिहारमधील सर्व २४३ विधानसभा जागांवर मतमोजणीची व्यवस्था करण्यात आलीय. प्रत्येक मतदारसंघासाठी एक निवडणूक अधिकारी आणि एक मतमोजणी निरीक्षक तैनात केले गेले आहेत. वाद झाल्यास ईव्हीएम मते व्हीव्हीपॅट स्लिपशी जुळवली जाणार आहेत. निवडणूक निकाल राउंड-वाइज आणि विधानसभे प्रमाणे संकलित केले जातील. त्यानंतर संबंधित आरओद्वारे निवडणूक आयोगाच्या अधिकृत निकाल पोर्टलवर अपलोड केले जातील.

ईव्हीएम मतांच्या मोजणीदरम्यान प्रत्येक नियंत्रण युनिट टेबलावर आणले जाईल. ते एजंट्सला दाखवले जातील जेणेकरून त्यांचा शिक्का आणि अनुक्रमांक त्यात नोंदवलेल्या तपशीलांशी जुळतो का ते तपासता येईल. जर कोणत्याही बूथमधील मतांच्या संख्येत किंवा नोंदींमध्ये तफावत आढळली तर त्या बूथच्या व्हीव्हीपॅट स्लिप अनिवार्यपणे मोजल्या जातील. प्रत्येक टेबलावर एक मतमोजणी पर्यवेक्षक, एक मतमोजणी सहाय्यक आणि एक सूक्ष्म निरीक्षक तैनात करण्यात आलेत.

याशिवाय उमेदवारांनी नियुक्त केलेले १८,००० हून अधिक मतमोजणी एजंट मतमोजणी प्रक्रियेवर लक्ष ठेवतील. जेणेकरून संपूर्ण प्रक्रिया पारदर्शक आणि निष्पक्ष राहील. तर ईव्हीएमची मोजणी पूर्ण झाल्यानंतर, प्रत्येक विधानसभा मतदारसंघात यादृच्छिकपणे ५ मतदान केंद्रे निवडली जातील, जिथे व्हीव्हीपॅट स्लिप ईव्हीएम निकालांशी जुळवल्या जातील

. हे काम उमेदवार आणि त्यांच्या एजंटांच्या उपस्थितीत केले जाईल. बिहार विधानसभा निवडणुकीसाठी ६ आणि ११ नोव्हेंबर रोजी दोन टप्प्यात मतदान झाले. यावेळी, बिहारमधील मतदानाचे सर्व रेकॉर्ड मोडले गेले. दोन्ही टप्प्यांमध्ये एकत्रित ६७.१३ टक्के मतदान झाले.