प्रसिद्ध शिक्षक आणि मोटिवेशनल स्पीकर अवध ओझा यांनी राजकारणातून संन्यास घेण्याचा निर्णय घेतला आहे. अवध ओझा यांनी दिल्ली विधानसभा निवडणुकीदरम्यान राजकारण एन्ट्री केली होती. त्यांनी आम आदमी पक्षाच्या तिकीटावर पटपडगंज विधानसभा मतदारसंघातून निवडणूक लढवली होती. या निवडणुकीत त्यांचा पराभव झाला. त्यानंतर तब्बल १० महिन्यांनी त्यांनी राकारणातून संन्यास घेण्याचा निर्णय घेतला आहे. ओझा यांनी सोशल मीडियावर पोस्ट लिहित ही घोषणा केली.

अवध ओझा यांनी राजीनामा दिल्यानंतर पोस्टमध्ये म्हटलं आहे की, आम आदमी पक्षाचे संयोजक अरविंद केजरीवाल यांचं कौतुक केलं. अवध ओझा यांनी म्हटलं की, आदरणीय अरविंद केजरीवाल, मनीष सिसोदिया, संजयजी या सर्वांचा मी आभारी आहे. अरविंद हे मोठे नेते आहेत. पटपडगंज मतदारसंघातील लोकांचे आभार. मला त्यांनी खूप प्रेम दिलं. जय हिंद'.

आम आदमी पक्षाचे नेते, माजी आमदार सोमनाथ भारती यांनी अवध ओझा यांच्या राजीनाम्यावर भाष्य केलं. त्यांनी म्हटलं की, 'अवध ओझा यांचा व्यक्तिगतरित्या आदर करतो. परंतु राजकारण शॉर्टटर्म प्रोजेक्ट नाही. तुमच्या सारख्या व्यक्तीने राजकारणात पाऊल ठेवण्याआधी आणि आम आदमी पक्षात प्रवेश करण्याआधी विचार करणे गरजेचे होते'.

सोमनाथ भारती यांनी पुढे म्हटलं की, 'अनेक लोकांनी पटपडगंज विधानसभा मतदारसंघात मेहनत केली होती. त्यांना तिकीट देता आले असते. पक्षाने तुमच्यावर विश्वास ठेवून संधी दिली. पक्षाने निकालाचा विचार केला नाही. आम आदमी पक्ष भारताचं भविष्य आहे. या पक्षाला सर्व राज्यात यशस्वी करण्यासाठी कठोर परिश्रम केले पाहिजेत. भारतातील लोकसंख्येच्या ९० टक्क्यांहून अधिक लोकांच्या शिक्षण, आरोग्यसेवा आणि इतर मुलभूत गरजांविषयी कोणता पक्ष बोलतो? भाजप आणि काँग्रेसच्या नेत्यांची भाषणे ऐका. सर्वसामान्य लोकांच्या मूलभूत गरजांवर कोणीही बोलत नाही'.