Odisha Vigilance Raid: सरकारी इंजिनिअरच्या घरात व्हिजिलन्स विभागाने (Vigilance Department) अचानक धाड टाकली. अधिकाऱ्यांना धाड टाकण्यासाठी आलेले पाहून इंजिनिअरने ५०० रूपयांच्या नोटांचे बंडल खिडकीतून खाली फेकले. याचा व्हिडिओ सोशल मीडियावर व्हयारल झालाय. ओडिशामधील भुवनेश्वरमध्ये हा प्रकार घडलाय.

भुवनेश्वर येथील ग्रामीण विकास खात्यातील मुख्य अभियंता बैकुंठ नाथ सरांगी यांच्या सात ठिकाणांवर ओडिशा सतर्कता विभागाने (Vigilance Department) छापे टाकले. यावेळी तब्बल २.१ कोटी रुपये रोख रक्कम जप्त करण्यात आली. व्हिजिलन्स पथकाने सरांगी यांच्या भुवनेश्वर येथील फ्लॅटवर छापा टाकला, त्यावेळी त्यांनी ५०० रुपयांच्या नोटांचे गठ्ठे खिडकीतून बाहेर फेकण्याचा प्रयत्न केला, ज्यामुळे एकच खळबळ उडाली.

सरांगी यांच्याकडे उत्पन्नापेक्षा जास्त मालमत्ता असल्याची माहिती व्हिजिलन्स विभागाला मिळाली होती. विशेष न्यायाधीशांच्या परवानगीने गुरुवारी रात्री सात ठिकाणांवर छापे टाकण्यात आले. यामध्ये सरांगी यांचे अंगुल येथील दुमजली घर, भुवनेश्वरातील डमडुमा येथील फ्लॅट आणि पिपिली येथील सिउला मालमत्ताचा समावेश होता. छाप्यादरम्यान, भुवनेश्वर येथील फ्लॅटमधून १ कोटी रुपये आणि अंगुल येथील निवासस्थानातून १.१ कोटी रुपये जप्त करण्यात आले.

व्हिजिलन्स पथकाने नोटा मोजण्यासाठी मशीनचा वापर केला, त्यासाठी पाच ते सहा तास लागले. छाप्याच्या वेळी सरांगी यांनी खिडकीतून नोटांचे गठ्ठे फेकण्याचा प्रयत्न केला. त्यामुळे परिसरात नोटांचा पाऊस पडला होता. या घटनेने स्थानिकांमध्ये आश्चर्य आणि संताप व्यक्त केला गेला. व्हिजिलन्स विभागाच्या अधिकाऱ्यांनी सांगितले की, सरांगी यांच्याकडील मालमत्तेची चौकशी सुरू आहे आणि याप्रकरणी आणखी तपास केला जाईल.