Pune News : हडपसरमध्ये गोळीबार, मस्तीत मारलेली गोळी भावाला लागली

अक्षय बडवे, पुणे प्रतिनिधी

Pune Crime News : पुण्यातील हडपसरमध्ये गोळीबाराची थरारक घटना घडली. एका मुलाने गुरुवारी रात्री मस्तीत पिस्तूलमधून गोळी फायर केली, ती गोळी थेट भावाला लागली. या घटनेनंतर परिसरात एकच खळबळ उडाली. हडपसर येथील मुंडवा पोलीस स्टेशनमध्ये गुन्हा दाखल करण्यात आला आहे. पोलिसांकडून या प्रकरणाचा तपास केला जात आहे. सूत्रांच्या माहितीनुसार, गोळी झाडणारा मुलाचे राजकीय पक्षासोबत संबंध आहेत.

मस्तीत पिस्तुल लोड करून हवेत गोळी फायर करत असताना त्या तरूणाच्या मावस भावाच्या खांद्यातून गोळी आरपार गेली. गावठी पिस्तुलातून हा गोळीबार झाल्याची माहिती समोर आली आहे. या प्रकरणी पुण्यातील मुंडवा पोलिसात गुन्हा दाखल झाला आहे. गुरूवारी रात्री ही घटना घडल्याचे समोर आले आहे.

पोलिसांनी दिलेल्या माहितीनुसार, जखमी वैभव श्रावण गवळी (वय 20) हा त्याचा मावस भाऊ सुमित खवळे, बसवराज सुतार यांच्यासह गुरुवारी रात्री 08.15 वाजताच्या सुमारास दुचाकीवरून हडपसर मधील पांढरे मळा कॅनॉल येथे वाढदिवसाकरिता जात होता. यावेळी सुमित खवळे याने त्याचे जवळ अवैध्यरित्या बाळगलेल्या गावठी कट्ट्यामधून गोळी सुटून त्याचे समोर त्याचे गाडीवर असलेल्या वैभव गवळी याचा डाव्या खांद्यावर लावली आणि यात तो जखमी झाला.

सध्या त्याच्यावर ससून हॉस्पिटल येथे उपचार सुरू असून तो सुस्थितीत आहे. जखमी इसम वैभव गवळी व सुमित खवळे हे एकमेकांचे मावसभाऊ आहेत. सुमित खवळे आणि त्याने गुन्ह्यात वापरलेली दुचाकी व गावठी कट्टा जप्त केला आहे. पोलिस गुन्हा नोंद करून पुढील तपास करीत आहेत.