भारत निवडणूक आयोगाने (Election Commission Of India) बिहार, पश्चिम बंगाल, तामिळनाडू, मध्य प्रदेश, उत्तराखंड, पंजाब आणि हिमाचल प्रदेशमधील १३ विधानसभा मतदारसंघात पोटनिवडणूक (Assembly Constituencies Bypolls) घेण्याचा निर्णय घेतला आहे. निवडणूक आयोगाने पोटनिवडणुकीची तारीख जाहीर केली आहे. पुढच्या महिन्यात १० जुलै रोजी ही पोटनिवडणूक होणार आहे. तर १३ जुलै रोजी मतमोजणी होणार आहे.

निवडणूक आयोगाने सोमवारी पश्चिम बंगालमधील ४ जागांसह सात राज्यांतील १३ विधानसभा जागांसाठी पोटनिवडणुकीच्या तारखा जाहीर केल्या. विद्यमान सदस्यांच्या निधनामुळे किंवा राजीनामा दिल्यामुळे रिक्त झालेल्या जागांवर पोटनिवडणूक होणार आहे. निवडणूक आयोगाने आज या विधानसभा मतदारसंघाच्या पोटनिवडणुकीची तारीख जाहीर केली. याठिकाणी १० जुलैला मतदान आणि १३ जुलैला निकाल लागणार आहे.

ज्या विधानसभा जागांवर पोटनिवडणूक होणार आहे. त्यामध्ये बिहारच्या रुपौली मतदारसंघ, पश्चिम बंगालचा रायगंज मतदारसंघ, राणाघाट दक्षिण मतदारसंघ, बागडा मतदारसंघ आणि मानिकतला मतदारसंघ, तामिळनाडूचा विक्रवंडी मतदारसंघ, मध्य प्रदेशचा अमरवाडा मतदारसंघ, उत्तराखंडचा बद्रीनाथ मतदारसंघ आणि मंगलौर मतदारसंघ, पंजाबचा जालंधर पश्चिम मतदारसंघ आणि हिमाचल प्रदेशचा हमीपूर मतदारसंघ आणि नालागड मतदारसंघाचा समावेश आहे.

या विधानसभा पोटनिवडणुकीसाठी १४ जून रोजी निवडणुकीची अधिसूचना जारी होणार आहे. उमेदवारी अर्ज भरण्याची शेवटची तारीख २१ जून आहे. २४ जून रोजी नामनिर्देशन पत्रांची छाननी होणार आहे. तर उमेदवारी अर्ज मागे घेण्याची अंतिम तारीख २६ जून आहे. १० जुलै रोजी पोटनिवडणूक होणार असून १३ जुलै रोजी मतमोजणी होणार आहे. १५ जुलैपूर्वी पोटनिवडणूक पूर्ण करावयाची असल्याचे निवडणूक आयोगाने सांगितले आहे.