सचिन बनसोडे, साम टीव्ही

अशोक खरात प्रकरणात एक पाठोपाठ नवीन खुलासे समोर येत आहे. शेकडो महिलांचं लैंगिक शोषण करणाऱ्या खरात सध्या पोलीस कोठडीत आहे. त्याच्यावर आतापर्यंत १२ गुन्हे दाखल झाले आहेत. त्याने ७ महिन्यांच्या गरोदर महिलेवरही लैंगिक अत्याचार केल्याचं उघड झालं आहे. नराधम अशोक खरातने कोट्यवधीची माया देखील कमावल्याचे उघड झालं आहे. त्यामुळे आता पोलिसांकडून खरातच्या संबंधितांनाही नोटीस बजावण्यास सुरुवात केली आहे. शिर्डी पोलिसांनी आता रुपाली चाकणकर यांच्या बहीण प्रतिभा यांनाही नोटीस धाडली आहे.

अशोक खरातचे नाशिक, अहिल्यानगरमध्ये कोट्यवधींची संपत्ती आहे. त्याचे शेकडो बँक खात्याशी कनेक्शन असल्याचे उघड झालं आहे. अशोक खरात १३२ बँक खात्याचा नॉमिनी आहे. याच प्रकरणात रुपाली चाकणकरांच्या बहीण प्रतिभा चाकणकर यांची चौकशी होणार आहे. समता पतसंस्थेत प्रतिभा चाकणकर आणि कुटुंबीयांच्या नावे चार खाती आहेत. प्रतिभा चाकणकर यांच्या नावे दोन तर मुलांच्या नावे दोन खाती आहेत.

प्रतिभा चाकणकरांच्या बँक खात्यात २ कोटी ४० लाख रुपयांचा व्यवहार देखील झाल्याचे समोर आलं आहे. याच प्रकरणात चौकशीसाठी शिर्डी पोलिसांनी प्रतिभा चाणकर यांना नोटीस धाडली आहे. प्रतिभा चाकणकर यांच्या दोन पत्त्यावर नोटीस पाठवण्यात आली आहे. नोटीस मिळताच पाच दिवसाच्या आत चौकशीला हजर राहण्याचे निर्देश देण्यात आले आहे.

समता पतसंस्थेत भोंदू अशोक खरात नॉमिनी असणारी 100 खाती आहेत. 57 लोकांच्या नावे 100 खाती आहेत. 2021 साली एकाच दिवशी सर्व खाती उघडली गेली. 100 खात्यांवरून 60 कोटींहून अधिकचा व्यवहार झाला आहे. आत्तापर्यंत 33 खातेदारांची चौकशी पूर्ण झाली आहे. आमच्या नावाची खाती असल्याचे माहित नाही, असा जबाब 33 खातेदारांनी पोलिसांना दिला आहे. तर आता प्रतिभा चाकणकर यांनाही चौकशीसाठी नोटीस पाठवण्यात आली आहे. चाकणकर चौकशीला कधी हजर राहणार आणि त्यांच्या जबाबातून काय माहिती समोर येणार याकडे लक्ष लागलं आहे.