अमेरिकेतील दक्षिण पेनसिल्व्हेनियामधून एक धक्कादायक घटना समोर आली आहे. तीन पोलीस अधिकाऱ्यांना गोळ्या घालून ठार मारण्यात आले आहे. तर, इतर दोघे जखमी झाले असल्याची माहिती आहे. दरम्यान, पोलिसांनी हल्लेखोराला ठार मारले आहे. या प्रकरणी पोलिसांकडून तपास सुरू आहे.

नक्की काय घडलं?

पोलीस अधिकाऱ्यांनी दिलेल्या माहितीनुसार, पोलिसांचा फौजफाटा आरोपीला ताब्यात घेण्यासाठी गेला होता. त्यावेळी हल्लखोर दबा धरून बसला होता. त्यावेळेस आरोपींनं अंदाधुंद गोळीबार केली. या हल्ल्यात ५ पोलीस कर्मचाऱ्यांना गोळी लागली. त्यातील ३ पोलीस कर्मचाऱ्यांचा मृत्यू झाला.

सीएनएन वेबसाईटनुसार, ही भयंकर घटना नॉर्थ कोडोरस टाऊनशिप परिसरात घडली आहे. आरोपीला ताब्यात घेत असताना हा हल्ला झाला. पेनसिल्व्हेनियाचे गर्वनर जोश शापिरो यांनी या घटनेबाबात सांगितले की, 'या देशाची सेवा करणाऱ्या या अधिकाऱ्यांच्या निधनाबद्दल आम्ही शोक व्यक्त करतो'.

'या प्रकाराची हिंसाचार योग्य नाही. या प्रकरणाची पूर्ण, निष्पक्ष चौकशी होईपर्यंत आम्ही स्वस्थ बसणार नाही', असे पेनसिल्व्हेनियाचे पोलीस आयुक्त क्रिस्टोफर पॅरिस म्हणाले. यॉर्क हॉस्पिटलने दोन गंभीर जखमींवर उपचार सुरू केले आहेत. सुरक्षा व्यवस्था देखील वाढवण्यात आली आहे. अद्याप पोलिसांकडून अधिकृत माहिती समोर आलेली नाही.

फेब्रुवारी महिन्यांतही याच भागांत गोळीबाराची घटना घडली होती. पिस्तूल घेऊन एक व्यक्ती रूग्णलयाच्या अतिदक्षता विभागात गेला होता. गोळीबार करण्यापू्र्वी आरोपीनं कर्मचाऱ्यांना डांबून ठेवलं होतं. या घटनेत एका पोलीस अधिकाऱ्याचा मृत्यू झाला होता.