अमेरिकेतील न्यू जर्सीमध्ये एक धक्कादायक घटना घडली आहे. न्यू जर्सीमध्ये एका रुग्णालयात महिलेच्या शरीरात डुक्कराची किडनी प्रत्यारोपित करुन तिचे प्राण वाचवले आहे. या महिलेचे हृदय आणि मुत्रपिंडाने काम करणे जवळपास बंद केले होते. यावेळी ती महिला वाचण्याची खूप कमी शक्यता होती. मात्र, डॉक्टरांनी नवीन तंत्रज्ञानाच्या मदतीने या महिलेचे प्राण वाचवले आहे.

मिळालेल्या माहितीनुसार, अमेरिकेतील न्यू जर्सी येथील एका हॉस्पिटलमध्ये हा प्रकार घडला आहे. डॉक्टरांनी महिलेला डुक्कराची किडनी प्रत्यारोपित करुन तिच्या हृदयाचे ठोके पुन्हा सुरु केले आहेत. लिसा पिसानो असे या महिलेचे नाव आहे. या महिलेचे हृदय आणि मूत्रपिंड निकामी झाले होते. त्यामुळे पारंपारिक पद्धतीने अवयव प्रत्यारोपण करणे शक्य नव्हते. त्यामुळे त्यांनी यांत्रिक पद्धतीचा वापर केला आहे.

महिलेचा जीव वाचवण्यासाठी ही पद्धत वापरण्यात आली

एनवाययू लँगोन हेल्थ इन्स्टिट्यूटच्या डॉक्टरांनी ही नवीन पद्धत शोधून काढली आहे. ज्यात महिलेचे प्राण वाचवण्यासाठी एक यांत्रिक पंप बसवण्यात आला. काही दिवसांनी डुक्कराची किडनी प्रत्यारोपित करण्यात आली. मागील महिन्यात मॅसॅच्युसेट्स जनरल हॉस्पिटलमध्ये महिलेवर शस्त्रक्रिया करण्यात आली. यानंतर महिलेच्या प्रकृतीत सुधारणा होत असल्याचे डॉक्टरांनी बुधवारी सांगितले. पिसानो ही जगातील दुसरी महिला आहे जिच्या शरीरात डुक्कराची किडनी प्रत्यारोपित करण्यात आली आहे.

याआधी मार्चमध्ये पहिल्यांदा डुक्कराची किडनी प्रत्यारोपण करण्यात आले होते. मॅसॅच्युसेट्स जनरल हॉस्पिटलमध्ये एका ६२ वर्षीय व्यक्तीच्या शरीरात डुक्कराच्या किडनीचे प्रत्यारोपण करण्यात आले होते.