पाकिस्तान आणि अफगाणिस्तानमधील सीमावाद आता पूर्णतः युद्धाच्या छायेत ओढला गेलाय. पाकिस्तानी संरक्षण मंत्री ख्वाजा आसिफ यांनी अफगाणिस्तानविरोधात ओपन वॉरची घोषणा केलीय. पाकिस्तानी सैन्यानं अफगाणिस्तानच्या लष्करी तळांना टार्गेट केलंय.. काबूल, पक्तिया आणि कंधार भागात हवाई हल्ले सुरू आहेत. काबुलमध्ये जवळपास 2 तास लढाऊ विमानांचा आवाज येत होता. त्याशिवाय जोरदार स्फोट, गोळीबारही झाला.

या हल्ल्याला सडेतोड उत्तर देऊ असा इशाराही अफगाणिस्तानच्या सरकारने दिलाय. अफगाणी सैन्यानेही पाकिस्तानच्या सीमेवरील चौक्यांना टार्गेट केलय. त्यानंतर काही तासांत पाकिस्ताननेही पलटवार केला. पाकिस्तानी सैन्यानं अफगाणिस्तानच्या सैन्य मुख्यालयासह अनेक तळांवर हल्ले सुरू केले आहेत. या युद्धाबाबत पाकिस्तनचे संरक्षणमंत्री ख्वाजा आसिफ यांनी सोशल मीडियात काय पोस्ट केलीय पाहूयात

पाकचं ‘ऑपरेशन गजब लिल हक’

आमच्या संयमाची सीमा आता ओलांडली गेलीय. आता आमच्यात आणि तुमच्यात उघड युद्ध सुरू झालंय. अफगाणिस्तानातील टीटीपी या दहशतवादी संघटनेचे तळ उद्ध्वस्त करण्यासाठी हे स्ट्राईक करण्यात आले आहेत.

पाकिस्ताननं या मोहिमेला 'ऑपरेशन गजब लिल हक' असं नाव दिलंय. दुसरीकडे अफगाणी सैन्यानं पक्तिया, खोस्त, नंगरहार, कुनार आणि नूरिस्तानसारख्या भागात पाकिस्तानी हल्ल्याला उत्तर देत पाकच्या सैन्याला मागे ढकललंय. त्यांनी पाकिस्तानी एअरक्राफ्टही पाडले आहेत. संयुक्त राष्ट्रांनी या संघर्षाबाबत चिंता व्यक्त केलीय. तर अमेरिकेनं अफगाणिस्तानच्या बाजूनं उडी घेत पाकला इशारा दिलाय.

अफगाणिस्तानचे झेंडे लावून अमेरिकेची वाहनं युद्धभूमीकडे रवाना झाली आहेत. आधीच इराण-अमेरिका आणि इस्रायल-पॅलेस्टाईन संघर्ष सुरू आहे. रशियाशी मैत्री करणाऱ्या देशांना रोखण्यासाठी अमेरिकेनं टॅरिफ वॉर सुरू केलंय. त्यात पाकिस्तान-अफगाणिस्तान युद्धाचा भडका उडाला तर त्याचे परिणाम आशिया खंडातल्या व्यापारावर होतील आणि स्वाभाविकच त्याचा फटका भारतालाही बसेल.