इराण आणि इस्त्रायलचं (Iran Isarael War) युद्ध काही थांबायचं नाव घेत नाहीये. अशातच आता या युद्धात अमेरिकादेखील सहभागी झाली आहे. अमेरिकेने इराणवर हवाई हल्ला केला आहे. तीन आण्विक स्थळांवर हा हल्ला केला आहे. हा हल्ला यशस्वी झाला असल्याचे सांगितले जात आहे. जर हा हल्ला यशस्वी झाला असेल तर इराणचे खूप नुकसान झाले असेल.

अमेरिकेने इराणचे तीन आण्विक स्थळे फोर्डो, नतांज आणि इस्फहानवर हवाई हल्ला केला आहे. अमेरिकेचे राष्ट्राध्यक्ष डोनाल्ड ट्रम्प यांनी स्वतः सोशल मीडियावर ही माहिती पोस्ट करत दिली आहे.

ट्रम्प यांची माहिती (Donald Trump Give Information)

अमेरिकेचे (America) राष्ट्राध्यक्ष डोनाल्ड ट्रम्प यांनी सांगितले की, सर्व अमेरिकेची विमाने ही इराणच्या हवाई सीमेबाहेर आली आहेत. ती सुरक्षित अमेरिकेत परतली आहेत. यातील सर्वाधिक बॉम्ब हे फोर्डो नावाच्या ठिकाणी टाकण्यात आले आहेत. त्यांनी अमेरिकेच्या सैन्याचं कौतुकदेखील केलं आहे. आपण महान योद्ध्यांचं खूप अभिनंदन.जगातील कोणतेही सैन्य ही कामगिरी करु शकत नाही. आता शांतीची वेळ आली आहे.

या हल्ल्यानंतर इराणकडून कोणतीही प्रतिक्रिया आलेली नाही. इराणने या हल्ल्याबाबत अजूनही मौन व्रत ठेवले आहे.

गेल्या नऊ दिवसात ४०० हून अधिक इराणी नागरिकांचा मृत्यू

इराणच्या आरोग्य मंत्रालयाने सांगितले की, गेल्या नऊ दिवसांत इस्त्रायलने केलेल्या हल्ल्यामध्ये ४०० हून अधिक नागरिकांचा मृत्यू झाला आहे. आणि ३,०५६ जण जखमी झाले आहेत. जखमींमध्ये २,२०० जणांवर रुग्णालयात उपचार सुरु आहेत.