Aam Aadmi Party : आम आदमी पक्षाचा पंजाबमधील आमदार अडचणीत आला आहे. मारहाण आणि विनयभंगाच्या प्रकरणात खादूर साहिबचे आमदार मनजिंदर सिंह लालपुरा यांच्यासह ७ आरोपींना तरनतारन जिल्हा न्यायालयाने दोषी ठरवले आहे. आपच्या आमदारासह सर्व आरोपींना पोलिसांनी ताब्यात घेतले आहे. या प्रकरणाचा निकाल दोन दिवसांनी लागणार आहे.

एका मुलीला मारहाण आणि विनयभंग प्रकरणी आमदारासह अन्य आरोपींना दोषी ठरवण्यात आले आहे. १२ सप्टेंबर रोजी आरोपींना शिक्षा सुनावण्यात येणार आहे. मुलीवर हल्ला केल्याचा गुन्हा असल्याचे आमदार मनजिंदर सिंह लालपुरा यांच्या वकिलांनी सांगितले आहे. या प्रकरणाचा निकाल येणे अजून बाकी आहे. आम्ही जिल्हा न्यायालयाच्या निकालाला उच्च न्यायालयात आव्हान देऊ असेही लालपुरा यांच्या वकिलाने म्हटले आहे.

२०१३ मध्ये मनजिंदर सिंह लालपुरा हे टॅक्सी चालक होते. तरनतारन जिल्ह्यातील उस्मा गावातील एका मुलीने लालपुरा यांच्या विरोधात गंभीर आरोप केले होते. लग्न समारंभात विनयभंग आणि मारहाण केल्याचा आरोप या मुलीने केला होता. घटनास्थळी तपास करण्यासाठी आलेल्या पोलिसांनीही मला मारहाण केली असे मुलीने म्हटले होते. या घटनेचा व्हिडीओ व्हायरल झाला. यादरम्यान सर्वोच्च न्यायालयाने या घटनेची दखल घेतली आणि मुलीच्या कुटुंबाला सुरक्षा देण्याचे आदेश दिले.

टॅक्सी ड्रायव्हर असलेले मनजिंदर सिंह लालपुरा २०२२ मध्ये खदूर साहिब मतदारसंघातून निवडून आले. त्यांना आम आदमी पक्षाने संधी दिली होती. लालपुरा हे १६,४९१ मतांनी विजयी झाले होते. खदूर साहिब विधानसभेत काँग्रेसचे उमेदवार सलग दोनदा जिंकून आले होते. पण २०२२ मध्ये काँग्रेसची जागा आम आदमी पक्षाने जिंकली.