पंजाब: अमृतसर येथील आम आदमी पक्षाचे नेते जयपाल सिंह बाऊ यांना दिवसाढवळ्या गोळ्या झाडल्याची खळबळजनक घटना समोर आली आहे. या घटनेनंतर परिसरात मोठी दहशत पासली असून जखमी अवस्थेत जयपाल सिंह बाऊ यांना अमृतसर येथील एका रुग्णालयात दाखल केले आहे. मिळालेल्या माहितीनुसार, जयपाल सिंह यांचा गाडी पार्किंगवर झालेल्या वादाचे रूपांतर हाणामारीत झाले आणि हा वाद विकोपाला जाऊन गोळीबार झाला. यामध्ये आम आदमी पक्षाचे नेते जयपाल सिंह आणि नरेंद्र सिंह हे या घटनेत जखमी झाले.

घटनेची माहिती मिळताच पोलीस घटनास्थळी दाखल झाले आणि परिसर सील केला. जयपाल सिंह बाऊ हे आम आदमी पक्षाचे नेते असून अमृतसरमधील वॉर्ड क्रमांक 42चे प्रभारी आहेत. त्यांनी यापूर्वी आम आदमी पक्षाच्या वतीने त्यांनी पालिकेची निवडणूक लढवली होती. घटनेनंतर आम आदमी पक्षाचे आमदार इंदारवीर सिंह निज्जर हे देखील रुग्णालयात दाखल झाले. त्यांनी जयपाल सिंग यांच्या प्रकृतीची विचारपूस केली आणि डॉक्टरांकडून त्याच्या तब्येतीची माहिती घेतली.

आमदार निज्जर म्हणाले, या घटनेमागील खरा हेतु काय होता हे अजून स्पष्ट झालेले नाही, तसेच यामध्ये काही राजकीय वैर असल्याचे देखील समोर आले नाहीये. तपासानंतरच सर्व समोर येईल. नगरससेवक वरपाल सिंग बब्बर यांनी सांगितले की, जयपाल सिंग हे माझे जवळचे सहकारी आहेत. प्राथमिक माहितीनुसार, परिस्थिति चिघळली आणि त्याचे रूपांतर संघर्षात आणि गोळीबार झाले. या घटनेचा पोलीस अधिक तपास करत असून पंजाबच्या राजकारणात मोठी खळबळ उडाली आहे.