नवी दिल्ली : केंद्र सरकार (Central Government) शासकीय कर्मचाऱ्यांना जूलै महिन्यात एक मोठी भेट देणार अशी शक्यता निर्माण झाली आहे. या कर्मचार्‍यांना त्यांचा महागाई भत्त्याचा फरक (थकित डीए) मिळणार असल्याचे सूत्रांकडून समजते. त्याबाबतची अधिकृत घाेषणा अद्याप झालेली नाही. याबराेबरच कर्मचाऱ्यांच्या महागाई भत्त्यात वाढ केली जाणार असल्याचे संकेत मिळाले आहेत. जानेवारी 2020 ते जून 2021 या कालावधीचा कर्मचाऱ्यांना अद्याप डीएचे पैसे मिळालेले नाहीत. त्यांनी थकीत रक्कम मिळावी यासाठी सातत्याने सरकारकडे मागणी केली हाेती.

कोविडमुळे (Covid) केंद्र सरकारने आराेग्य विभागावर जादा खर्च करीत कर्मचा-यांना भत्ता दिला नव्हता. गेल्या 18 महिन्यांचा भत्ता सरकार देण्याच्या विचारात असल्याचे बाेलले जात आहे.

सरकार दोन लाख रुपये देऊ शकते

सरकार कर्मचाऱ्यांच्या खात्यात एकदम दाेन लाख रुपये भरेल अशी शक्यता वर्तवली जात आहे. कर्मचाऱ्यांना त्यांच्या पगाराच्या बॅंडनुसार डीएची थकबाकी मिळू शकणार आहे सरकारने डीएची थकबाकी दिली तर वर्ग एकच्या कर्मचार्‍यांची रक्कम 11880 ते 37000 रुपयांपर्यंत राहील.

DA वाढू शकतो

वाढती महागाई लक्षात घेता सरकार कर्मचाऱ्यांच्या डीएमध्ये वाढ करून कर्मचा-यांना दिलासा देईल अशी शक्यता आहे. सध्या कर्मचाऱ्यांना ३४ टक्के दराने डीए मिळत आहे. मार्चमध्ये सरकारने महागाई भत्ता ३ टक्क्यांनी वाढवला होता. जुलै महिन्यात सरकार केंद्रीय कर्मचाऱ्यांच्या डीएमध्ये ४ ते ५ टक्के वाढ करेल अशी शक्यता आहे. सरकारकडून याबाबत अद्याप कोणतीही अधिकृत माहिती दिलेली नाही.

कर्मचाऱ्यांना लाभ मिळेल

सरकारने कर्मचाऱ्यांच्या डीएमध्ये चार टक्क्यांनीही वाढ केल्यास ५० लाख कर्मचाऱ्यांना आणि ६५ लाख पेन्शनधारकांना याचा लाभ मिळेल. सरकारी कर्मचाऱ्यांना दिलेला डीए हा त्यांच्या आर्थिक सहाय्य वेतन संरचनेचा भाग आहे.

Edited By : Siddharth Latkar