In india 622 Sanitation Workers Died Last 9 Years लोकसभेत सादर करण्यात आलेल्या सरकारी आकडेवारीनुसार, देशात २०१७ ते २०२६ या काळात गटार आणि सेप्टिक टँकच्या दुर्घटनांमध्ये ६२२ स्वच्छता कामगारांचा मृत्यू झाला असल्याची धक्कादायक आकडेवारी समोर आली आहे. या आकडेवारीनंतर स्वच्छता कामगारांच्या सुरक्षिततेचा मुद्दा ऐरणीवर आला आहे.

लोकसभेत मंगळवारी समाजवादी पक्षाच्या खासदार इक्रा चौधरी यांनी सामाजिक न्याय आणि सक्षमीकरण मंत्रालयाला गटार सफाई करणाऱ्या कामगारांच्या पुनर्वसनाबाबत विचारलेल्या प्रश्नाला उत्तर देताना देशभरातून एकूण ६२२ कामगारांचा मृत्यू झाल्याची आकडेवारी समोर आली. उत्तर प्रदेशात ८६ ,महाराष्ट्रात ८२, तामिळनाडूमध्ये ७७, हरियाणात ७६, गुजरातमध्ये ७३ आणि दिल्लीत ६२ गटार साफ करताना कामगारांचे मृत्यू झाले.

धक्कादायक म्हणजे मृत्यू झालेल्या कामगारांपैकी अनेक कुटुंबाना त्याची भरपाई देखील प्रलंबित असल्याचे समोर आले. अनेक राज्यांमध्ये कुटुंबाना भरपाई देण्यात आलेली नाही. मृत्यूंची संख्या आणि नुकसान भरपाई मिळालेल्या कुटुंबांची संख्या यांमध्ये तफावत जाणवत आहे.

उत्तर प्रदेशात ८६ पैकी १३ कुटुंबांना कोणतीही आर्थिक मदत मिळाली नसून दिल्लीत ६२ कुटुंबांपैकी नऊ कुटुंबांना काहीही मिळाले नसल्याचे द प्रिंट या वृत्त वाहिनीच्या अहवालात म्हटले आहे. या माहितीनंतर स्वच्छता कामगारांच्या सुरक्षिततेचा मुद्दा ऐरणीवर आला आहे.