सागर आव्हाड, साम टीव्ही

पुणे: येरवड्यातील खुल्या कारागृहातून एका जन्मठेपेची शिक्षा भोगणाऱ्या कैद्याने पळ काढल्याची धक्कादायक घटना समोर आली आहे. गेल्या आठवड्यातील ही दुसरी घटना असल्याने कारागृह प्रशासनाच्या सुरक्षेवर प्रश्नचिन्ह उपस्थित केले जात आहे. जनार्दन शंकर आडसुळे (रा.काशेवडी, भवानी पेठ) असे फरार झालेल्या कैद्याचे नाव आहे. आडसुळे याच्यावर खडक पोलीस ठाण्यात खुनाचा गुन्हा दाखल असून न्यायालयाने त्याला जन्मठेपेची शिक्षा सुनावली होती. कारागृहातील चांगल्या वर्तनामुळे त्याची रवानगी खुल्या कारागृहात करण्यात आली होतो. जिथे तो शेतीचे कामे करत असे.

12 मे रोजी कामावर असताना त्याने सुरक्षा रक्षकांच्या डोळ्यांत धूळ फेकत पलायन केले. रात्री उशिरापर्यंत तो परत न आल्याने शोध घेण्यात आला, मात्र तो सापडला नाही. या प्रकरणी प्रशासनाचे अधिकारी चंद्रकांत सयाजी खांदवे यांनी येरवडा पोलीस ठाण्यात फिर्यादी दिली असून पोलिसांनी गुन्हा दाखल केला आहे.

आठवड्यात दुसऱ्यांदा झाली घटना

येरवडा कारागृहातून कैदी पळण्याची ही आठवड्यातील दुसरी घटना आहे. यापूर्वी 8 मे रिजी संतोष लक्ष्मण भिंगारे (रा. पाचवड, सातारा) या जन्मठेपेच्या कैद्यानेही अशाच प्रकारे पलायन केले होते. भिंगारे याचा अद्याप शोध लागलेला नसताना आडसुळे फरार झाल्याने खळबळ उडाली आहे. फरार दोन्ही आरोपी खुनाच्या गुन्ह्यातील जन्मठेपेचे कैदी आहेत. येरवडा पोलीस सध्या या फरार कैद्याचा कसून शोध घेत आहेत.