सचिन गाड| मुंबई, ता. ८ जुलै २०२४

वरळीमधील हिट अँड रन प्रकरणाने राज्यभरात खळबळ उडाली आहे. रविवारी पहाटे भरधाव बीएमडब्ल्यू कारने दांपत्याला उडवल्याची घटना घडली. या प्रकरणी आता सर्वात महत्वाची अपडेट समोर आली असून पोलिसांनी आरोपी मिहिर शहाच्या नावाने लूक आऊट सर्क्युलर जारी केले आहे.

याबाबत सविस्तर माहिती अशी की, रविवारी पहाटे वरळीमध्ये भरधाव बीएमडब्ल्यू कारने दांपत्याला उडवल्याची घटना घडली. त्यानंतर गाडीवरील महिलेला काही किलोमीटरपर्यंत फरफटत नेले. या अपघातानंतर कारचालक मिहिर शाह फरार झाला आहे. पोलीस त्याचा शोध घेत असून आता आरोपी मिहिर शहाच्या नावाने लूक आऊट सर्क्युलरही जारी करण्यात आले आहे.

आरोपी परदेशात पळून जाऊ नये म्हणून पोलिसांनी लूकआऊट सर्क्युलर काढले असून मिहिर शहाला शोधण्यासाठी सहा पथकं स्थापन करण्यात आली आहेत. तर गुन्हे शाखा देखील या प्रकरणाचा समांतर तपास करणार आहे.

दरम्यान, काल वरळी हिट अँड रन प्रकरणात वरळी पोलिसांनी शिंदे गटाचे उपनेते राजेश शहा आणि राजेंद्रसिंह बिडावत यांना अटक केली. राजेश शहा आरोपी मिहिर शहा यांचे वडील आहेत तर चालक राजेंद्रसिंह बिडावत अपघातावेळी गाडीत असल्याचे स्पष्ट झाले आहे. दिवसभराच्या चौकशीनंतर या दोघांना अटक करण्यात आली आहे.