संजय गडदे, साम टीव्ही

मुंबईच्या चारकोप विधानसभा मतदारसंघातील मतदार यादीतील घोळ थांबता थांबत नाही. यादी क्रमांक 87 मध्ये विजय गोहिल या एकाच व्यक्तीचे तीन वेगवेगळ्या EPIC नंबरवर नाव नोंद झाल्याचा धक्कादायक प्रकार उघडकीस आला आहे.

उल्लेखित EPIC क्रमांक — AVE7141393, AVE7146871, AVE7148091 — हे तिन्ही नंबर एकाच पत्त्यावर, डी विंग 202, सुरभी कॉम्प्लेक्स, येथे नोंदवलेले आहेत. एकाच व्यक्तीचे, एकाच यादीत, एकाच पत्त्यावर तीन वेगळे EPIC नंबर कसे काय नोंदवले गेले, असा गंभीर प्रश्न उपस्थित आहे. या प्रकाराला मनसेचे चारकोप विधानसभा अध्यक्ष दिनेश साळवी यांनी वाचा फोडली आहे.

या प्रकाराकडे निवडणूक आयोगाचे लक्ष का गेले नाही, याबाबत देखील मोठ्या प्रमाणात नाराजी व्यक्त होत आहे. या प्रकारामुळे मतदारयादीतील अचूकतेवर प्रश्नचिन्ह निर्माण झाले आहे.

काही दिवसांपूर्वी शोधली होती चूक

काही दिवसांपूर्वी मनसेने घोळ शोधला होता. यमुनाबाई गणपत कांबळे नावाच्या महिलेच्या मतदार नोंदीवर बुरखा घातलेल्या मुस्लिम महिलेचा फोटो निरीक्षणात समोर आला होता. त्यावेळी गंभीर विसंगतीमुळे निवडणूक प्रक्रियेत मोठ्या प्रमाणावर प्रश्न उपस्थित करण्यात आला होता. या प्रकारानंतर आता आणखी एक समोर आला आहे.