महेंद्र वानखेडे, साम टीव्ही

विरार : राज्यात भीषण अपघाताचं सत्र सुरु आहे. विरारमध्ये पुन्हा एकदा भीषण अपघाताची घटना घडली आहे. विरारमध्ये टेम्पोने दोन वर्षांच्या चिमुकलीला चिरडल्याची घटना घडली आहे. या अपघातात दोन वर्षीय चिमुरडीचा जागीच मृत्यू झाला आहे.

मिळालेल्या माहितीनुसार, विरार पश्चिममेकडील डोंगरपाडा परिसरात दूध वाहून नेणाऱ्या पिकअप टेम्पोने दोन वर्षीय मुलीला चिरडल्याची घटना घडली आहे. रिया सिंग असं या चिमुकलीचे नाव आहे. आज सकाळच्या सुमारास आत्माराम पार्क परिसरात इमारतीच्या गेटजवळ रिव्हर्स घेणाऱ्या दूधाच्या टेम्पोने धडक दिली. त्यात चिमुकलीचा जागीच मृत्यू झाला आहे.

या अपघातानंतर विरार पोलिसांनी घटनास्थळी धाव घेऊन मृतदेह ताब्यात घेऊन शवविच्छेदनासाठी पाठवला आहे. टेम्पो चालकाला पोलिसांनी ताब्यात घेतलं आहे. विरार पोलिसांनी या प्रकरणी गुन्हा दाखल केला आहे.

मद्यधुंद कारचालकाने चिरडल्याने झाला होता प्राध्यापिकेचा मृत्यू

काही महिन्यांपूर्वी विरारमध्ये एका भरधाव कारने प्राध्यापिक महिलेला चिरडलं होतं. या भीषण अपघातात प्राध्यापक महिलेचा मृत्यू झाला होता. या अपघातानंतर कारचालकाला अटक केली होती. आत्मजा कसाट असे मृत्यू झालेल्या प्राध्यापिकेचे नाव होते. त्या उत्कर्ष कनिष्ठ महाविद्यालयात शिकवायच्या. भीषण अपघातानंतर पोलिसांनी शुभम पाटील या चालकाला अटक केली होती. अपघातानंतर शुभम पाटीलचे मित्र-मैत्रिणी फरार झाले होते.

नांदेडमध्ये धावत्या मोटारसायकलने घेतला पेट

नांदेडमध्ये धावत्या मोटारसायकलने अचानक पेट घेतला. नांदेड शहरातील शिवाजीनगर भागात ही घटना घडली. सत्यवान उमाटे हे आपल्या मोटारसायकलने नांदेड शहरात कामानिमित्त आले होते. शिवाजीनगर भागात त्यांच्या मोटारसायकलने अचानक पेट घेतला. सुदैवाने या घटनेत कोणालाही दुखापत झाली नाही. परंतु मोटारसायकल जाळून खाक झाली आहे .अग्निशमन दलाच्या जवानांनी ही आग विझविली. या घटनेने मात्र शिवाजीनगर भागात एकाच धावपळ उडाली होती.