सचिन जाधव, पुणे

पुण्यातील राष्ट्रवादी काँग्रेसचे माजी नगरसेवक वनराज आंदेकर हत्या प्रकरणात (Vanraj Andekar Case) मोठी अपडेट समोर आली आहे. या हत्या प्रकरणात मध्यप्रदेश कनेक्शन उघड झाले आहे. वनराज यांच्या हत्येसाठी मध्यप्रदेशमधून पिस्तुल पुरवण्यात आले होते. हे पिस्तुल आणण्यासाठी मदत करणाऱ्याला अटक करण्यात पुणे पोलिसांना यश आले आहे. या हत्याप्रकरणात याआधीच पोलिसांनी अनेकांना अटक केली आहे. यामध्ये वनराज आंदेकर यांच्या दोन बहिणी आणि मेहुण्यांचा देखील समावेश आहे.

मिळालेल्या माहितीनुसार, वनराज आंदेकर यांची हत्या करण्यासाठी हल्लेखोरांना मध्य प्रदेशातून पिस्तुले आणण्यास मदत करणाऱ्याला पोलिसांनी अटक केली आहे. त्याला मोक्का न्यायालयाचे न्यायाधीश यांनी १ ऑक्टोबरपर्यत पोलिस कोठडी सुनावली आहे. अभिषेक ऊर्फ आबा नारायण खोंड असे अटक करण्यात आलेल्या आरोपीचे नाव आहे. अभिषेक शिवणे येथील लक्ष्मी गार्डन सोसायटीमध्ये राहतो. अभिषेकच्या अटकेनंतर या गुन्‍ह्यात अटक करण्यात आलेल्या आरोपींचा आकडा आता २१ वर गेला आहे. यासह दोन अल्पवयीन मुलांनाही ताब्यात घेण्यात आले आहे.

वनराज आंदेकर यांची हत्या टोळी वादातून झाला असून त्यासाठी वापरलेली पिस्तुले मध्य प्रदेशातून आणण्यासाठी आरोपी अभिषेक खोंड याने आरोपी आकाश म्हस्के, समीर काळे आणि विवेक कदम यांना मदत केल्याचे पोलिसांच्या तपासात उघड झाले आहे. हत्या झाल्यावर अभिषेक खोंड फरार झाला होता. या कालावधीत त्याला कोणी आश्रय दिला?, कोणी आर्थिक मदत केली?, त्याने आणखी काही पिस्तुले आणली आहेत का?, त्याची कोणाला विक्री केली आहे का? या बाबींचा तपास पोलिसांना करायचा आहे.