Vaishnavi Hagawane News : पुणे पोलिसांकडून हगवणे कुटुंबियांना नोटीस पाठवण्यात आली आङे. शस्त्र परवाना रद्द का करु नये असे या नोटीसमधून विचारण्यात आले आहे. हगवणे यांचा शस्त्र परवाना रद्द करावा अशी सूचना पिंपरी चिंचवड पोलिसांनी पत्रातून केली आहे. हगवणेंच्या शस्त्र परवान्याबाबत पिंपरी चिंचवड पोलिसांनी पुणे पोलिसांना अहवाल दिला आहे.

वैष्णवी हगवणे प्रकरणात न्यायालयाने वैष्णवीचे सासरे आणि दीर यांना ३१ मे पर्यंतची पोलीस कोठडी सुनावली होती. तर वैष्णवीचा नवरा शशांक, सासू लता आणि नणंद करिष्मा यांना एका दिवसाची पोलीस कोठवडी सुनावली होती. आज कोठडीची कालावधी संपल्यानंतर पुन्हा तिघांना न्यायालयासमोर सादर करण्यात आले.

शशांक हगवणे, लता हगवणे आणि नणंद करिष्मा हगवणे यांना न्यायालयाने १४ दिवसांची न्यायालयीन कोठडी सुनावली. त्यानंतर लगेचच लता आणि करिष्मा हगवणे यांनी जामिनासाठी पुणे जिल्हा सत्र न्यायालयात अर्ज केला. त्यांच्या अर्जाच्या निवंतीवर उद्या न्यायालयात सुनावणी होणार असल्याची शक्यता वर्तवली जात आहे. याच दरम्यान पुणे पोलिसांकडून हगवणे कुटुंबाला नोटीस पाठवण्यात आल्याची माहिती समोर आली.

हगवणे कुटुंबाला त्यांच्याकडे असणाऱ्या शस्त्र परवाना बाबत पिंपरी चिंचवड पोलिसांकडून सूचना करण्यात आली आहे. तुमचा परवाना रद्द का करु नये असा सवाल नोटीसमधून विचारण्यात आला आहे. जर या नोटीसवर हगवणे कुटुंबियांनी उत्तर दिले नाही, तर त्यांचा शस्त्र परवाना रद्द केला जाईल. पुढील आठवड्यात पुणे पोलीस शस्त्र परवाना रद्द करु शकतील असे म्हटले जात आहे. हगवणे कुटुंबियांकडे ३ शस्त्र परवाने आहेत.