गणेश कवडे, साम टीव्ही, प्रतिनिधी

मुंबईच्या यशवंतराव चव्हाण सेंटरमध्ये सुरु असलेल्या कार्यक्रमात एका अज्ञात व्यक्तीने गोंधळ घातल्याची बातमी समोर आली आहे. येथे कार्यक्रमात सुरु असताना एक अज्ञात व्यक्ती व्यासपीठावर चढला आणि त्यांनी गोंधळ घालण्यास सुरुवात केल्याची माहिती मिळत आहे. हा व्यक्ती व्यासपीठावर चढला तेव्हा मंचावर शरद पवार, काँग्रेस नेते बाळासाहेब थोरात आणि इतर मान्यवर उपस्थित होते.

मिळालेल्या माहितीनुसार, यशवंतराव चव्हाण सेंटरमध्ये उदय गुलाबराव शेळके फाऊंडेशनच्या बोधचिन्ह आणि संकेतस्थळाचा अनावरणा कार्यक्रमात होता. या कार्यक्रमात शरद पवार आणि बाळासाहेब थोरातही उपस्थित होते. त्याच वेळी हा अज्ञात व्यक्ती मंचावर चढला आणि त्याने गोंधळ घालण्यास सुरुवात केली.

ऐन कार्यक्रम सुरु असताना ही व्यक्ती मंचावर आली. हा व्यक्ती मंचावर आल्यानंतर पोलिसांनी त्याला तात्काळ ताब्यात घेतलं आणि मंचावरून त्याला खाली उतरवून ताब्यात घेतलं. मात्र हा व्यक्ती मंचावर का गेला होता, त्याने गोंधळ का घातला? याबाबत अद्याप कोणतीही माहिती मिळू शकलेली नाही. पोलीस याप्रकरणी या अज्ञात व्यक्तीची चौकशी करत आहेत.

पुण्यात स्वातंत्र्य दिनाच्या कार्यक्रमात राडा

दरम्यान, पुणे महापालिकेच्या स्वातंत्र्य दिन समारंभात एका दिव्यांग बांधवाने पिंपरी चिंचवड महापालिका आयुक्त शेखर सिंह यांच्या शासकीय चारचाकी वाहनाच्या काचा फोडल्याची घटना ही आज घडली. या व्यक्तीने निषेध नोंदवल्यासाठी हा प्रकार केलं असल्याचं सांगण्यात येत आहे.

विनायक सोपान ओव्हाळ, असं या दिव्यांग बांधवाचं नाव आहे. ओव्हाळ यांच्या मागण्यांकडे महापालिका आयुक्त शेखर सिंह यांनी सातत्याने दुर्लक्ष केल्याचं, त्यांचं म्हणणं आहे. त्यामुळे त्यांनी स्वातंत्र्य दिनाच्या कार्यक्रमात महापालिक आयुक्त शेखर सिंह यांच्या शासकीय वाहनाची काच पडून आपला निषेध नोंदवला आहे.