डोंबिवलीतून एक धक्कादायक बातमी समोर येत आहे. डोंबिवलीतील चौधरी वाडी मैदानात आरएसएसच्या वीर सावरकर शाखेवर दगडफेक करण्यात आली आहे. ९ मार्चला रात्रीच्या सुमारास ही दगडफेक करण्यात आली आहे. रात्रीच्या वेळेस काही लहान मुले शाखेत प्रशिक्षण घेत होते. यादरम्यान अचानक काही अज्ञतांकडून वीर सावरकर शाखेवर दगडफेक करण्यात आली. यात सुदैवाने कुणी जखमी झाले नसून, पुढील तपास पोलीस करीत आहेत.

डोंबिवली पूर्वेतील चौधरीवाडी मैदानावर, राष्ट्रीय स्वयंसेवक संघाच्या वीर सावरकर शाखेत काही लहान मुलांना प्रशिक्षण देण्यात येत होते. ९ मार्चला रात्रीच्या सुमारास प्रशिक्षण कार्यक्रम सुरू होते. या दरम्यान, काही अज्ञतांकडून दगडफेक करण्यात आली. जंगलातून आणि शेजारील इमारतीतून काही अज्ञतांनी दगडफेक केली होती.

दगडफेकीनंतर लहान मुले घाबरले होते. काही वेळ शाखेजवळ तणावाचं वातावरण निर्माण झालं होतं. या दगडफेकीत सुदैवानं कुणीही जखमी झालेले नाही. काही वेळानंतर परिस्थिती नियंत्रणात आली. ही शाखा राष्ट्रीय स्वयंसेवक संघटनेची असून, शाखेचे अध्यक्ष संजू चौधरी आणि शिक्षक पवन कुमार हे शाखेचं कामकाज पाहतात.

दगडफेकीनंतर संघटनेचे कार्यकर्ते आक्रमक झाले. त्यांनी संताप व्यक्त केला. सध्या कार्यकर्त्यांकडून दगडफेक करणाऱ्यांवर पोलीस ठाण्यात गुन्हा दाखल करण्यात आला असून, पोलीस दगडफेक करणाऱ्यांचा शोध घेत आहेत.