संजय गडदे, मुंबई

Mumbai News: कांदिवलीच्या लालजीपाडामध्ये एकाची गोळ्या (Kandivali Firing) झाडून निर्घृण हत्या करण्यात आली होती. या हत्येप्रकरणी पोलिसांनी (Kandivali Police) उत्तर प्रदेशातून (Uttar Pradesh) एकाला अटक केली आहे. अवघ्या काही तासांमध्येच पोलिसांनी या हत्या प्रकरणाचा छडा लावला आहे. प्रेम प्रकरणातून ही हत्या करण्यात आल्याची माहिती पोलीस तपासात उघड झाली आहे.

रविवारी सकाळी कांदिवली पश्चिमच्या गणेश नगरमधील लालजी पाडा येथे गोळीबाराची घडना घडली होती. या गोळीबारात मनोजसिंग चौहान या 32 वर्षांच्या तरुणाचा जागीच मृत्यू झाला होता. मनोजसिंगवर दोन गोळ्या झाडण्यात आल्या होत्या. यामधील एक गोळी त्याच्या डोक्याला लागली. गोळीबारानंतर आरोपी फरार झाला होता. याप्रकरणी कांदिवली पोलिसांच्या गुन्हे शाखेने तपास सुरु केला होता. पोलिसांनी अवघ्या काही तासांमध्येच आरोपीला अटक केली आहे.

कांदिवली पोलिसांच्या गुन्हे शाखेचा तपास पथकाने उत्तर प्रदेश येथून अटक केली आहे. आरोपी उत्तर प्रदेशमधील प्रयागराज रेल्वे स्थानकात असताना पोलिसांनी त्याला ताब्यात घेतले. पोलिसांनी रात्री उशिरा आरोपीला मुंबईत आणले. रोहित पाल असे अटक करण्यात आलेल्या आरोपीचे नाव आहे. प्रेम प्रकरणातून रोहितने मनोजसिंगची हत्या केली असल्याची कबुली दिली आहे.

मनोजसिंग हा इमिटेशन ज्वेलरीसाठी काम करायचा. ही गोळीबाराची घटना सीसीटीव्हीत कैद झाली होती या सीसीटीव्ही फूटेजच्या आधारेच पोलिसांनी आरोपीचा शोध घेतला आहे. पोलिसांनी आरोपीच्या अटकेसाठी सहा पथके तैनात केली होती. गोळीबारानंतर आरोपी उत्तर प्रदेशला पळून गेला होता. प्रयागराज रेल्वे स्थानकावर पोहचताच पोलिसांनी त्याला बेड्या ठोकल्या. कांदिवलीमध्ये गेल्या सहा महिन्यात गोळीबाराची ही दुसरी घटना घडली आहे.