संघर्ष गांगुर्डे, कल्याण

Kalyan Dombivli Madhur Mhatre News कल्याणमधून मोठी बातमी समोर आली आहे. ठाकरे गटाचे मधुर म्हात्रे यांची पक्षातून हकालपट्टी करण्यात आली आहे. वारंवार नोटीस देऊनही पक्षाच्या बैठकीला अनुपस्थित राहणे, तसेच पक्षाच्या आदेशाचे उल्लंघन केल्यामुळे त्यांना पक्षातून काढण्यात आल्याची माहिती पक्षाकडून देण्यात आली.

मिळालेल्या माहितीनुसार, केडीएमसी निवडणुकीत शिवसेना उद्धव बाळासाहेब ठाकरे पक्षातून एकूण ११ नगरसेवक निवडून आले होते. त्यापैकी मधुर म्हात्रे हे निवडून आल्यापासूनच शिवसेना शिंदे गट यांच्या संपर्कात असल्याची चर्चा होती. या पार्श्वभूमीवर पक्षाकडून त्यांना वारंवार कारणे दाखवा नोटीस देण्यात आली होती.

मात्र, नोटीस देऊनही मधुर म्हात्रे यांनी पक्षाच्या नाव नोंदणीसह गटाच्या कोणत्याही बैठकीला उपस्थिती लावली नाही. इतकेच नव्हे तर पालिकेच्या महासभेच्या दिवशीही पक्षाने दिलेला आदेश धुडकावल्याचे सांगितले जात आहे. त्यामुळे अखेर पक्षाने त्यांच्यावर शिस्तभंगाची कारवाई करत पक्षातून हकालपट्टी करण्याचा निर्णय घेतला.

या कारवाईनंतर केडीएमसीमधील शिवसेना उद्धव बाळासाहेब ठाकरे गटात आता १० नगरसेवक शिल्लक राहिले असून पक्षशिस्त पाळण्याबाबत इतर सदस्यांना देखील स्पष्ट संदेश देण्यात आल्याचे पक्षाच्या पदाधिकाऱ्यांनी सांगितले.