रोहिदास गाडगे

जुन्नर : उत्तर पुणे जिल्ह्यात चोरी दरोड्यांच्या (Robbery) घटना दिवसेंदिवस वाढत असताना आज रात्रीच्या सुमारास जुन्नर (Junnar) तालुक्यातील आळेफाटामध्ये भर लोकवस्तीतील साई इलेक्ट्रॉनिक्स दुकानात चार दरोडेखोरांनी पिस्तुलाचा धाक दाखवून रोख रक्कम, मोबाईल चोरून नेली असल्याची घटना घडली आहे. हा दरोड्याचा थरार सीसीटीव्ही कॅमेरामध्ये कैद झाला आहे.

हे देखील पहा-

काही दिवसांपूर्वीच शिरुर तालुक्यातील महाराष्ट्र बँक मधील दरोडा नंतर जुन्नरमध्ये अनंत पतसंस्थेवर भर दुपारी दरोडा पडला होता. त्यामध्ये पतसंस्थेचे व्यवस्थापक राजेंद्र भोर यांचा मृत्यू झाला होता. या घटनेचा तपास अद्याप सुरूच आहे.

ही घटना ताजी असतानाच आळेफाटा येथे पुन्हा बंदुकीचा धाक दाखवून दरोडा पडल्यामुळे परिसरात एकच खळबळ उडाली आहे. 17 हजार रुपये, ९ हजार किंमतीचा मोबाईल व गाडीची चावी या गोष्टी दरोडेखोरांनी नेल्या आहेत. त्यामुळे अशा दरोड्याच्या घटना रोखण्याचे मोठे आवाहन ग्रामीण पोलिसांसमोर असणार आहे.