राज ठाकरे यांच्याबद्दल अपशब्द लिहिणाऱ्या विरोधात पुण्यामध्ये मनसे कार्यकर्ते चांगलेच आक्रमक झाले आहेत. पुण्यातील वनाज भागात राहणाऱ्या केदार सोमण यांच्या घराबाहेर मनसे कार्यकर्त्यांनी आक्रमक होत जोरदार घोषणाबाजी करत राडा घातला. राज ठाकरेंबाबत आक्षेपार्ह पोस्ट करणाऱ्या केदार सोमण यांना मनसे कार्यकर्ते चोप देण्याच्या तयारीत होते. पण पोलिसांनी वेळीच हस्तक्षेप करत या मनसे कार्यकर्त्यांना ताब्यात घेतलं.

मिळालेल्या माहितीनुसार, राज ठाकरे यांच्याविरोधात आक्षेपार्ह पोस्ट केल्याबद्दल मनसे कार्यकर्ते आक्रमक झालेत. कोथरूड येथील केदार सोमण नावाच्या व्यक्तीच्या घरी मनसे कार्यकर्त्यांनी आज गोंधळ घातला. पोलिसांनी वेळीच हस्तक्षेप केल्यामुळे संभाव्य राडा टळला. मनसे प्रवक्ते हेमंत संभूस यांच्या अध्यक्षतेखाली मनसे कार्यकर्त्यांकडून हे आंदोलन करण्यात आले. कोथरूड येथील राहणारा केदार सोमण यांनी उद्धव ठाकरे आणि राज ठाकरे यांच्याविरोधात आक्षेपार्ह पोस्ट केली होती.

केदार सोमण यांची ही पोस्ट समाज माध्यमांवर व्हायरल झाल्यानंतर मनसे प्रवक्ते हेमंत संभूस यांनी सुमन यांचा पत्ता शोधून काढला. त्यानंतर मनसैनिकांनी आज सकाळी थेट त्यांच्या घरावर धडक दिली. सुमन यांच्या घरी मनसे कार्यकर्ते पोहोचल्यानंतर त्यांनी दरवाजा उघडला नाही त्यानंतर पोलिसांना याची माहिती मिळाली आणि पोलिस कोथरूड येथील इंद्रधनु सोसायटीमध्ये पोहचले. मोठ्या संख्येने मनसे कार्यकर्ते याठिकाणी आले होते.

पोलिसांनी मनसे कार्यकर्त्यांना सोसायटीच्या मुख्य द्वारापासून बाजूला केलं आणि रस्त्यावर घेऊन गेले आणि त्यानंतर केदार सोमण यांना पोलिसांनी ताब्यात घेतलं. मात्र केदार सोमाण यांना घेऊन जात असताना मनसे कार्यकर्त्यांनी पोलिसांच्या गाडीला अडवण्याचा प्रयत्न केला आणि पुन्हा गोंधळ घातला. पोलिसांनी मनसे कार्यकर्त्यांना ताब्यात घेतलं.