सागर आव्हाड, साम प्रतिनिधी

पुण्यातील हडपसर भागात असलेल्या वैदूवाडी उड्डाणपुलावर एक धक्कादायक प्रकार समोर आलाय. पुणे मनपाच्या रस्ते देखभाल आणि दुरुस्तीची पिकअप टेम्पो सुसाट सुटला, तेही रिव्हर्स. आता तुम्ही म्हणाल यात काय नवीन, अहो! खरी गमंत पुढे आहे, टेम्पो रिव्हर्स सुटला त्यावेळी टेम्पोत चालक नव्हता. विनाचालक टेम्पाने उलट्या पावली आपली वाट धरली होती. आता विचार करा, टेम्पो विनाचालक धावतो तेही उलटा आणि त्यात रात्रीची वेळ आहे ना धडकी भरवणारी घटना.

या घटनेचा व्हिडिओ सोशल मीडियावर खूप व्हायरल होत आहे. दरम्यान ही घटना रविवारी रात्री ११.४५ वाजता घडली. हा रिव्हर्स जाणारा टेम्पो डिव्हायडरला धडकल्याने मात्र मोठा अनर्थ टळलाय. हा टेम्पो पुणे महानगरपालिकेचा आहे, चालक टेम्पो चालू ठेवून उतरला असावा किंवा टेम्पो उभा असावा. त्याच दरम्यान टेम्पो रिव्हर्स गिअरमध्ये पडला आणि ८०च्या वेगाने हा टेम्पो मागे धावू लागला. सुदैवाने मागून कोणताचे वाहन आले नसल्याने कोणताच अनर्थ टळला.

मनपाचा पिकअप टेम्पो ८० प्रतितासच्या वेगाने उलट्या दिशेने धावत होता, जवळपास ५०० फूट अंतर हा टेम्पो रिव्हर्स झाला. रस्त्यावरील डिव्हायडरवर धडकल्याने हा टेम्पो पूर्णपणे थांबला. त्यामुळे कोणताच अपघात झाला नाही. दरम्यान विनाचालक धावणाऱ्या टेम्पोचा व्हिडिओ सोशल मीडियावर खूप व्हायरल होतोय.

रस्त्याच्या दुसऱ्या बाजूने बाईकवरुन जाणाऱ्या लोकांनी हा व्हिडिओ शूट केलाय. मात्र घडलेल्या प्रकरणाची चौकशी होणं अपेक्षित आहे. त्यामुळे पुणे महानगरपालिका याप्रकरणी काय कारवाई करते ते पाहणं महत्त्वाचे ठरणार आहे.