Dombivli Accident: मालकाने गाडी दिली, क्लिनरने भरधाव पिकअप चालवत तरुणाला उडवले, झोमॅटो डिलिव्हरी बॉयचा दुर्दैवी अंत; ८ दुचाकीनांही धडक

अभिजीत देशमुख, कल्याण|ता. २३ जून २०२४

पिकअप टेम्पो ड्रायव्हरने क्लिनरकडे चालवायला दिल्यानंतर भीषण अपघात झाल्याची घटना डोंबिवलीमध्ये घडली. भरधाव पीकअपने झोमॅटो बॉयला फरफटत नेले, या अपघातात त्याचा जागीच मृत्यू झाला असून सात ते आठ गाड्यांचे नुकसान झाले आहे. या घटनेनंतर सर्वत्र संताप व्यक्त केला जात असून चालक तरुणाला ताब्यात घेण्यात आले आहे.

डोंबिवलीतील खोणी पलावा परिसरात काल रात्रीच्या सुमारास भीषण अपघाताची घटना घडली. गाड्या धुण्यासाठी वापरण्यात येणाऱ्या पाण्याची वाहतुक करणारा पिकअप टेम्पो चालकाने आपल्या क्लिनरला चालवायला दिली. क्लिनरने टेम्पो भरधाव वेगाने चालवत रस्त्यावर उभ्या असलेल्या एका झोमेटो कर्मचाऱ्याला जोरदार धडक दिली.

या धडकेत या झोमॅटो डिलिव्हरी बॉय काही अंतरापर्यंत फरफटत गेला. ज्यामध्ये त्याचा दुर्दैवी मृत्यू झाला. सौरभ यादव असे मृत तरुणाचे नाव आहे. इतकेच नाही टेम्पोवरील नियंत्रण सुटल्याने रस्त्यालगत असलेल्या सात ते आठ दुचाकींनाही या टेम्पोने धडक दिली .या अपघातानंतर परिसरात मोठ्या प्रमाणात जमाव जमा झाला होता.

घटनेची माहिती मिळताच मानपाडा पोलिसांनी धाव घेत टेम्पोचा क्लिनर अतिष जाधव याला ताब्यात घेतले. या अपघातात एका निष्पाप तरुणाचा बळी गेला तर सात ते आठ गाड्यांचे नुकसान झाले . त्यामुळे क्लीनरसह टेम्पो मालकाविरोधात देखील गुन्हा दाखल करत कठोर कारवाई करण्याची मागणी नागरिकांकडून केली जात आहे.