सचिन जाधव, पुणे

Pune Sinhagad Kalyan Darwaja Worker Death Body found पुणे सिंहगड किल्ल्यावरील नरवीर तानाजी मालुसरे समाधिस्थळावर ठेकदाराकडे काम करणाऱ्या मजुराचा मृतदेह सायंकाळच्या सुमारास किल्ल्यावरील कल्याण दरवाजाच्या दरीत आढळला. दशरथ शंकर धोत्रे असे ह्या मृत मजूराच नाव आहे. ते मूळचे अहिल्यानगर जिल्ह्यातील श्रीरामपूर येथील रहिवासी होते.

मिळालेल्या माहितीनुसार, मृत धोत्रे हे चार दिवसांपूर्वीच सिंहगड किल्ल्यावर कामासाठी आले होते. धोत्रे हे त्यांच्या इतर ४-५ साथीदारांसोबत सिंहगड किल्ल्यावरील तानाजी मालुसरे समाधी परिसरातील पुरातत्व विभागाचे काम करणाऱ्या ठेकेदाराकडे काम करीत होते. कामानिमित्त धोत्रे आणि त्यांचे सहकारी मित्र हे सिंहगड किल्ल्यावरच वास्तव्यास होते.

दरम्यान दशरथ धोत्रे हे बुधवारी मध्यरात्रीपासून गायब होते. त्यांच्या सहकाऱ्यांना वाटले की, ते गावाकडे निघून गेले असतील. दिवसभर त्यांचा फोनही झाला नाही. मात्र, इकडे कल्याण दरवाजा परिसरात सायंकाळच्या सुमारास पर्यटकांना मृतदेह आढळला आणि एकच खळबळ उडाली आहे.

या घटनेची माहिती मिळताच हवेली आपत्ती व्यवस्थापनाचे तानाजी भोसले आणि त्यांच्या सहकाऱ्यांनी गडावर धाव घेत दरीतून मृतदेह बाहेर काढला. स्थानिक राजगड पोलिसांकडे सुपूर्त केला. दरम्यान हा अपघाती मृत्यू आहे की घातपात हे अद्याप समोर आलेलं नाही. याप्रकरणी पोलीस खोल तपास करत आहे.