अक्षय बडवे, साम टीव्ही, प्रतिनिधी

Pune City News : दिवाळीचा सण अवघ्या काही दिवसांवर आला आहे. दिवाळीपूर्वी पुणे महापालिकेमध्ये काम करणाऱ्या कर्मचाऱ्यांसाठी महत्त्वाची बातमी समोर आली आहे. महापालिकेच्या कर्मचाऱ्यांच्या सानुग्रह अनुदानात वाढ झाली आहे. यामुळे या कर्मचाऱ्यांची दिवाळी आणखी गोड होणार असल्याचे म्हटले जात आहे.

मिळालेल्या माहितीनुसार, पुणे महानगरपालिकेतील सर्व अधिकारी आणि कर्मचारी यांना दिवाळीच्या मुहूर्तावर ८.३३ टक्के बोनस मिळणार आहे. त्याचप्रमाणे त्यांना २५ हजार रुपयांचे सानुग्रह अनुदान दिले जाणार आहे. ही रक्कम दिवाळी पूर्वीच सर्व अधिकारी आणि कर्मचाऱ्यांच्या खात्यात जमा होणार असल्याचे जाहीर करण्यात आले आहे.

पुणे महापालिका कर्मचाऱ्यांच्या सानुग्रह अनुदानामध्ये दोन हजार रुपयांची वाढ झाली आहे. त्यांना दिवाळी बोनससह २५ हजार रुपयांचे सानुग्रह अनुदान दिले जाणार आहे. यंदाच्या वर्षी सानुग्रह अनुदानाच्या रकमेत दोन हजार रुपयांचा वाढ केल्याने कर्मचाऱ्यांची दिवाळी गोड होणार आहे. महापालिका वित्त व लेखा विभागाने बोनसबाबतचे परिपत्रक जारी केले आहे. याशिवाय सर्व खात्यांना संबंधित सूचनाही देण्यात आल्या आहेत.

सर्व अधिकारी व कर्मचारी सेवक (रोजंदारी कामगारांसह) आणि माध्यमिक व तांत्रिक शिक्षण विभागातील शिक्षक व शिक्षकेतर सेवकांना शिक्षण मंडळाकडील शिक्षक व शिक्षकेतर सेवकांना तसेच बालवाडी शिक्षण सेविका, शिक्षक, शिक्षण सेवक २०२४-२५ च्या मुळ वेतन, महागाई भत्ता यावर ८.३३ टक्के आणि २५ हजार रुपये सानुग्रह अनुदान देण्यात येणार आहे.