सागर आव्हाड, साम टीव्ही, प्रतिनिधी

Pune : पुण्यामध्ये गुंड निलेश घायवळ टोळीच्या उच्छाद मांडला आहे. पुण्यातील कोथरूडमध्ये निलेश घायवळ टोळीने मध्यरात्री गोळीबार केला. या गोळीबारामध्ये एका व्यक्तीला ३ गोळ्या लागल्या. गोळीबारनंतर टोळीतील गुंडांनी एकावर कोयत्याने वार केले. या दोन्ही घटनेमधील आरोपींना पोलिसांनी अटक केल्याची माहिती समोर आली आहे.

मिळालेल्या माहितीनुसार, पुण्यात निलेश घायवळ टोळीतील तरुणांनी कोथरूड परिसरात गोळीबार केला. आम्हीच इथले भाई म्हणत त्यांनी ३६ वर्षीय प्रकाश धुमाळ या व्यक्तीवर गोळीबार केला. ही घटना कोथरूडच्या मुठेश्वर मंदिरासमोर उभा असताना प्रकाश धुमाळवर गोळीबार झाला. यात त्याला ३ गोळ्या लागल्या.

आम्हीच इथले भाई असे म्हणत टोळीतील तरुणांनी गोळीबार केला. गोळीबार केल्यानंतर १५ मिनिटांनंतर निलेश घायवळ टोळीतील गुन्हेगारांनी वैभव साठे या तरुणावर कोयत्याने वार केले. या घटनेमुळे परिसरात भीतीचे वातावरण निर्माण झाले आहे. पुण्यात निलेश घायवळ टोळीकडून दहशत माजवण्याचा प्रयत्न केला जात आहे. या दोन्ही घटनेत सहभागी ६ आरोपींना पोलिसांनी अटक केली आहे.

कोथरूड पोलिसांनी प्रशांत धुमाळ याच्यावर गोळीबार आणि वैभव साठे याच्यावर कोयत्याने वार करणे या दोन्ही वेगवेगळ्या घटना प्रकरणात गुन्हे दाखल केले आहेत. पोलिसांनी निलेश घायवळ टोळीतील मयूर कुंभारे, गणेश राऊत, मयंक व्यास, आनंद चांदलेकर, दिनेश फाटक आणि रोहित आखाड यांना अटक केली आहे. हे सर्वजण घायवळ टोळीतील सराईत गुन्हेगार आहेत.