अक्षय बडवे, साम टिव्ही

पुणे पोलीस दलातून धक्कादायक बातमी समोर येत आहे. पुणे पोलीस दलातील वरिष्ठ पोलीस निरीक्षक संदीप भोसले यांचे दीर्घ आजाराने निधन झाले आहे. वयाच्या ५५ व्या वर्षी त्यांनी अखेरचा श्वास घेतला. काही दिवसांपासून संदीप भोसले कर्करोगाने ग्रस्त होते. अखेर त्यांची गुरूवारी प्राणज्योत मालवली. त्यांच्या निधनामुळे पुणे पोलिस दलात हळहळ व्यक्त होत आहे. दरम्यान, त्यांच्या पार्थिवावर पुण्यातील हडपसर येथील अमरधाम स्मशानभूमीत शोकाकूळ वातावरणात अंत्यसंस्कार करण्यात आले. पुणे शहर पोलीस दलातील कर्तव्यदक्ष, प्रामाणिक आणि शिस्तबद्ध अधिकारी म्हणून त्यांची ओळख होती.

गुन्हे शाखेचे पोलीस निरीक्षकपदी असताना त्यांनी पुणे शहरातील अनेक गुन्ह्यांची उकल केली होती. काही महिन्यांपूर्वी त्यांची छत्रपती संभाजीनगर येथे बदली झाली आणि त्यावेळी त्यांना कर्करोगाचे निदान झाले. त्यानंतर त्यांनी पुन्हा पुण्यात बदलीसाठी विनंती केली होती. बदली झाल्यानंतर ते शहरात परतले. काही महिन्यांपासून त्यांच्यावर उपचार सुरू होते.

मात्र, उपचारादरम्यान, त्यांचे निधन झाले. त्यांच्या मागे पत्नी आणि २ मुलं असा परिवार आहे. त्यांच्या निधनानंतर भोसले परिवारावर दुखा:चा डोंगर कोसळला आहे.

१९९४ रोजी हवालदार म्हणून संदीप भोसले पोलीस दलात रुजू झाले. नंतर सेवाअंतर्गत परीक्षेमध्ये उत्तीर्ण होऊन २००४ रोजी पोलीस उपनिरीक्षक पदावर हजर झाले. २०१७मध्ये पोलीस निरीक्षक या पदावर पदोन्नती मिळवून त्यांनी महाराष्ट्र पोलीस खात्यातील अत्यंत जबाबदारीच्या ठिकाणी म्हणजेच गडचिरोली, पुणे शहर, पुणे ग्रामीण, सातारा, गुन्हे अन्वेषण, छत्रपती संभाजीनगर या ठिकाणी उल्लेखनीय सेवा बजावली.

२०१२मध्ये एलसीबी पुणे ग्रामीण येथे सपोनि या पदावर कामकाज करताना यवत पोलीस ठाणे हद्दीत सुपा घाट येथे रेकॉर्डवरील आरोपी बाळू ढोरे यास पकडण्यासाठी गेले असताना आरोपीने भोसले यांच्यावर गोळीबार केला. एक गोळी त्यांच्या डाव्या दंडामधून गेली. आत्मरक्षणाचे हेतूने त्यांनीही आरोपीवर गोळीबार केला आणि त्यात आरोपीचा मृत्यू झाला.

त्यांच्या कार्यकाळात त्यांनी १२ पेक्षा अधिक मोस्ट-वॉन्टेड आरोपींना अटक केली. पुणे शहर पोलीस दलाकडून त्यांना श्रद्धांजली अर्पण करण्यात आली आहे.