अक्षय बडवे, प्रतिनिधी

Maratha Reservation Protest Pune:

राज्यात सध्या मराठा आरक्षणाचा लढा दिवसेंदिवस तीव्र होत चालला आहे. कालपासून या आंदोलनाला हिंसक वळण लागले असून अनेक ठिकाणी बसवर दगडफेक, तसेच राजकीय नेत्यांच्या घरांची जाळपोळ केल्याच्याही घटना घडल्या. आजही मराठा बांधवांनी आक्रमक भूमिका घेत मुंबई - बेंगळोर महामार्ग रोखून धरला.

याबाबत अधिक माहिती अशी की, आरक्षणाच्या मागणीसाठी राज्यभरातील मराठा बांधव चांगलेच आक्रमक झाले आहेत. पुण्यातील नवले पुलाजवळ (Navale Bridge) मराठा आंदोलकांनी टायर जाळून आणि मुंबई- बेंगळुरू महामार्गावर आंदोलन केले. यावेळी आंदोलकांनी संपूर्ण महामार्ग रोखून धरला.

मराठा बांधवांच्या आक्रमक पावित्र्यामुळे संपूर्ण महामार्गावरील वाहतूक ठप्प झाली असून वाहनांच्या ८ ते ९ किलोमीटरपर्यंत वाहनांच्या लांबच लांब रांगा लागल्याचे पाहायला मिळत आहे. मुंबई- बेंगळुरू महामार्गावरुन अनेकजण सातारा, सांगली कोल्हापूरकडे प्रवास करत आहेत, तसेच अनेकजण मुंबईकडे जात आहेत, मात्र आंदोलकांनी गेल्या दोन तासांपासून महामार्ग रोखून धरल्याने प्रवासी आणि वाहन चालकांचे चांगलेच हाल होत आहेत.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

नागपूर- पुणे महामार्गावरही रास्ता रोको...

मनोज जरांगे पाटील यांच्या उपोषणाला पाठिंबा म्हणून ठिकठिकाणी आंदोलन, जाळपोळ होत असून बुलढाण्यात आज नागपूर- पुणे या राष्ट्रीय महामार्गावरील देऊळगाव मही येथ मराठा समाज आक्रमक झाला. अर्ध्या तासांपासून रास्ता रोको होत असल्याने यामुळे वाहनाच्या लांबच लांब रांगा लागल्या आहेत. सरकार विरोधात जोरदार घोषणाबाजी होत असून तत्काळ आरक्षण मिळावे, अशी मागणी आंदोलनकर्त्यांनी केली. (Latest Marathi News)