सचिन जाधव, पुणे

कोजागिरी पौर्णिमा पुणेकर मोठ्या उत्साहाता साजरी करत असतात. पौर्णिमेचा आनंद लूटण्यासाठी शहरातील पुणे महापालिकेच्या उद्यानांच्या वेळेमध्ये वाढ करण्यात आली आहे. हे उद्याने सकाळी ६ ते ११ वाजेपर्यंत आणि सायंकाळी ४.३० ते रात्री १२ वाजेपर्यंत उघडी ठेवण्यात येणार आहेत. नागरिकांनी याचा जास्तीत जास्त लाभ घ्यावा, असे आवाहन पुणे महापालिकेने केले आहे.

कोजागिरी पौर्णिमेनिमित्त पुणे महानगरपालिका हद्दीमधील उद्यानांच्या वेळेत वाढ करण्याचा निर्णय घेण्यात आला आहे. सार्वजनिक उद्याने, बागा मनोरंजनासाठी मोकळ्या जागांची तरतूद करणे, नागरिकांच्या मनोरंजनासाठी उद्याने, बागा उपलब्ध करून देणे बंधनकारक आहे. पुणे महानगरपालिका अधिकारी क्षेत्रामध्ये एकूण १५ क्षेत्रिय कार्यालयाच्या हद्दीअंतर्गत उद्यान विभागामार्फत एकूण २११ उद्याने, मत्सालय आणि प्राणी संग्रहालय विकसित करण्यात आलेली आहे.

उद्यानांचे विकसन, सुशोभिकरण, देखभाल, देखरेख व दुरुस्ती विषयक कामे उद्यान विभागामार्फत करण्यात येतात. उद्यानांमध्ये नागरिक, लहान मुलं, परदेशी नागरिक मोठ्या प्रमाणावर भेट देत असतात. १६ ऑक्टोबर २०२४ रोजी 'कोजागिरी पौर्णिमा' असून पुणे शहरातील नागरिक मोठ्या संख्येने उद्यानांमध्ये भेट देत असतात. शहरातील सर्व नागरिकांना सालाबादप्रमाणे कोजागिरी पौर्णिमेनिमित्त उद्याने रात्री १२ पर्यंत उघडी ठेवली जाणार आहेत.