राज्यात एका बाजूला अन्न व औषध प्रशासन विभागाचे आयुक्त तुकाराम मुंढे यांनी भेसळ विरोधी कारवाईचा धडका लावलाय मात्र असं असतानाच पुणे महापालिकेच्या आरोग्य विभागातील एक धक्कादायक प्रकार समोर आलाय. जवळपास 12 लाख रुपये खर्च करून खरेदी करण्यात आलेली फूड टेस्टिंग मशीन गायब झाल्याचा धक्कादायक प्रकार पुण्यातून समोर आलाय.

राज्याच्या अन्न व औषध प्रशासन आयुक्तपदी तुकाराम मुंढे यांनी पदभार स्वीकारल्यानंतर राज्यभर भेसळविरोधी कारवाईला वेग आला असताना, महापालिकेच्या आरोग्य विभागातील धक्कादायक निष्काळजीपणा समोर आला आहे. तब्बल ११ लाख ९८ हजार रुपये खर्चून खरेदी करण्यात आलेली फूड टेस्टिंग मशीन गायब असल्याची धक्कादायक माहिती महापालिकेच्या प्रश्नोत्तरातून उघड झाली आहे.

महापालिकेच्या आरोग्य विभागाने ९ वर्षांपूर्वी ११.९८ लाख रुपयांची फूड टेस्टिंग मशीन खरेदी केली होती. ही मशीन पुण्यातील कोंढवा भागातील फूड हायजीन अँड हेल्थ लॅबोरेटरी येथे कार्यरत होती. त्या प्रयोगशाळेचा करार संपल्यानंतर फेब्रुवारी २०१८ मध्ये प्रयोगशाळेतील सर्व उपकरणांचा ताबा तत्कालीन पशुवैद्यकीय अधीक्षकांकडे देण्यात आला. महापालिकेच्या सभेत नगरसेवक महेश वाबळे यांनी ही मशीन सध्या कार्यरत अवस्थेत आहे का, तसेच मशीनचे सर्व भाग उपलब्ध आहेत का? असा प्रश्न उपस्थित केला. त्यावर प्रशासनाने दिलेल्या लेखी उत्तरात फूड टेस्टिंग मशीन आढळून येत नसल्याचे स्पष्ट केलं आहे.