पुणे म्हाडा मंडळाच्या ४१८६ घरांसाठीची सोडत पुन्हा एकदा लांबणीवर गेली आहे. या घरांसाठी १६ किंवा १७ डिसेंबरला सोडत काढली जाईल, असं पुणे मंडळाने सांगितले होते. मात्र, तांत्रिक बिघाडामुळे ही सोडत रद्द करण्यात आली होती. दरम्यान, यामुळे घरांसाठी अर्ज केलेल्या नागरिकांची प्रतिक्षा वाढली आहे.

पुणे मंडळाच्या घरांसाठीची सोडत पुढे ढकलली

सुमारे दोन लाख १५ हजार अर्जदारांना सोडतीची प्रतिक्षा आहे. येत्या १-२ दिवसात घरांसाठी सोडतीची नवीन तारीख जाहीर होण्याची शक्यता आहे.सोमवारी सायंकाळी ६ वाजता पात्र अर्जांची प्रारूप यादी म्हाडाच्या अधिकृत संकेतस्थळावर प्रसिद्ध केली.

पुणे महामंडळाच्या घरांसाठी ११ सप्टेंबरपासून नोंदणी सुरु झाली होती. एकूण ४१८६ घरांसाठी ही सोडत जाहीर केली होती. यामध्ये २० टक्के सर्वसमावेशक योजनेअंतर्गत ३२२२ घरांसह १५ टक्के एकात्मिक योजनेतील ८६४ घरांचा सोडतीत समावेश आहे. ४१८६ घरांसाठी सोडतपूर्व प्रक्रिया सुरू झाली. मात्र संगणकीय प्रणालीतील तांत्रिक अडचणींमुळे या प्रक्रियेस दोनदा मुदतवाढ देण्यात आली.

ही मुदतवाढ २१ नोव्हेंबरपर्यंत देण्यात आली होती.त्यानंतर पुन्हा मुदत वाढवून ११ डिसेंबर करण्यात आली होती. ही सोडतदेखील पुढे ढकलली. त्यानंतर १६ की १७ डिसेंबरला सोडत काढली जाईल, असं पुणे मंडळाकडून जाहीर केले होते. मात्र, आता तेव्हादेखील सोडत निघणार नसल्याचे सांगितले आहे.

सूत्रांनी दिलेल्या माहितीनुसार,दोन लाख १५ हजार अर्जांची छाननी पूर्ण करून त्यांची प्रारूप यादी पूर्ण करण्यास विलंब झाला आहे. त्यामुळे सोडत लांबणीवर पडली आहे. अर्जांच्या छाननीचे काम आता पूर्ण झाले असून प्रारूप यादी प्रसिद्ध करून त्यावरील सुनावणी-हरकती मागवून अर्जांची अंतिम यादी प्रसिद्ध करण्यासाठी वेळ लागणार आहे. त्यामुळे ही सोडत पुढे ढकलण्याची वेळ मंडळावर आली आहे. मात्र, ही सोडत कधी निघणार याबाबत कोणतीही माहिती समोर आलेली नाही.