Pune Metro News : पुणे मेट्रोच्या हिंजवडी-शिवाजीनगर मार्गिकेचे व्यवस्थापन पॅरिसस्थित फ्रेंच कंपनी केओलिस करणार आहे. या कंपनीने पुणे आयटी सिटी मेट्रो रेल लिमिटेड म्हणजेच पीआयटीसीएमआरएलसोबत करार केला आहे. २२ अल्स्टॉम कंपनीच्या मेट्रो गाड्यांची देखभाल आणि २३ स्थानकांवरील तिकीट व्यवस्था याची जबाबदारी केओलिस कंपनीकडे असेल.

हिंजवडी ते शिवाजीनगर मेट्रो कॉरिडॉरवर सर्व महिला मेट्रो पायलट ठेवण्याची घोषणा केली आहे. २३ किमी लांबीचा हा मेट्रो मार्ग पुणे महानगर प्रदेश विकास प्राधिकरण (पीएमआरडीए) सार्वजनिक-खासगी भागीदारी अशा पीपीपी मॉडेलवर विकसित केले जात आहे. या मार्गिकेवर २३ स्थानके असतील. या मेट्रो मार्गावर ट्रायल रन आधीच पूर्ण झाले असून मार्च २०२५ पर्यंत सेवा सुरु होणे अपेक्षित आहे.

पुणे मेट्रोमधील हिंजवडी-शिवाजीनगर मेट्रो कॉरिडॉरचा फायदा अनेकांना होणार आहे. हिंजवडी आयटी पार्कमध्ये काम करणाऱ्या हजारो प्रवाशांना मेट्रो मार्गिकेमुळे मध्य पुण्याशी जोडेल. या प्रकल्पाचे सुमारे ८७ टक्के बांधकाम पूर्ण झाले आहे. सध्या जड बांधकामाचे बहुतांश काम अंतिम टप्प्यात आहे. सर्व काम वेळेत झाल्यास पुणेकरांना २०२६ पासून मार्गिकेवर मेट्रोन प्रवास करता येईल.

हिंजवडी आणि आसपासच्या परिसरात आयटी पार्कमध्ये अनेकजण कामाच्या निमित्ताने राहतात. आयटी पार्कमुळे परिसरातील वाहतुकी कोंडी होत असल्याचे पाहायला मिळते. हा त्रास कमी होण्यासाठी मेट्रोचा पर्याय उपलब्ध केला जात आहे. हिंजवडी-शिवाजीनगर पुणे मेट्रोसाठी एकूण ८,३१३ कोटी रुपये खर्च येणे अपेक्षित आहे. यातील १,३१५ कोटी रुपये खाजगी कंपन्यांनी गुंतवले आहेत आणि ४,७८९ कोटी रुपये कर्जाद्वारे उभारले आहेत. याशिवाय केंद्र सरकारकडून १,२२४.८ कोटी आणि महाराष्ट्र सरकारकडून ९०.५८ कोटी रुपयांची मदत मिळणार आहे.